काठमाडौं । नेपाली कांग्रेसका सभापति तथा पूर्व प्रधानमन्त्री शेरबहादुर देउवाले नेपाली कांग्रेसलाई समाजवादी विचारधारामा आधारित सबैभन्दा पुरानो र सुदृढ पार्टीको रूपमा चित्रित गरेका छन्।
सोमबार सानेपास्थित पार्टी केन्द्रीय कार्यालयमा आयोजित सम्मान कार्यक्रममा सम्बोधन गर्दै देउवाले कांग्रेसको सिद्धान्त र आदर्श अहिलेको समयको सन्दर्भमा झनै सान्दर्भिक बनेको उल्लेख गरे।
“हाम्रो पार्टीको आदर्श र सिद्धान्त अहिलेका प्रतिस्पर्धी दलहरूमध्ये सबैभन्दा मजबुत र जनतामुखी छ,” सभापति देउवाले भने, “नेपाली कांग्रेस लोकतान्त्रिक समाजवादमा आधारित समाजवादी पार्टी हो। यसले ल्याएका मूल्य, विचार र अभ्यासहरूलाई देशभर फैलाउन सक्नुपर्छ।”
उनले संविधानले समावेशी र समानुपातिक प्रतिनिधित्वलाई मूल मर्मका रूपमा अंगालेको भन्दै कांग्रेसले सबै जातजाति, वर्ग, समुदायलाई प्रतिनिधित्व गर्ने हैसियत राख्ने बताए।
“आजको राजनीतिक संरचनामा सबै समुदायलाई समेट्ने समावेशी सिद्धान्त आवश्यक छ, र कांग्रेस त्यही बाटोमा अघि बढिरहेको पार्टी हो,” देउवाले जोड दिए।
उनले पार्टीमा आदिवासी जनजाति र सबै वर्गका नागरिकलाई प्रभावकारी रूपमा सहभागी गराउँदै, जनताको मन जित्न सक्ने संगठन बनाउनु पर्ने आवश्यकता औंल्याए।
“हामी पुरानो मात्र होइन, विचारमा पनि परिपक्व पार्टी हौँ,” देउवाले भने, “देशभर हाम्रो सिद्धान्त र विचार जनतासम्म पुर्याउन सके नेपाली कांग्रेस फेरि बहुमतसहितको शक्तिशाली पार्टी बन्न सक्छ।”
कार्यक्रम नेपाली कांग्रेस पुस्तकालय तथा पार्टी अध्ययन स्रोत केन्द्र विभागले आयोजना गरेको थियो।
प्रकाशित मिति: ५ श्रावण २०८२, सोमबार
प्रतिक्रिया