काठमाडौं । नेपाली कांग्रेसका महामन्त्री विश्वप्रकाश शर्माले गठबन्धन सरकार आपसी सहमति र समझदारीको आधारमा अघि बढ्नुपर्नेमा जोड दिएका छन्।
मंगलबार बीपी कोइरालाको ४३औं स्मृति दिवसका अवसरमा काठमाडौंमा आयोजित कार्यक्रममा बोल्दै उनले हालको सरकार विभिन्न जटिलता र चुनौतीबीच बनेको स्मरण गराउँदै सहमतिमा आधारित कार्यशैलीले मात्रै गठबन्धनलाई दीगो बनाउन सकिने बताए।
महामन्त्री शर्माले विशेषतः कुलिङ अफ पिरियड र भूमि सम्बन्धी विधेयक जस्ता संवेदनशील मुद्दामा गठबन्धनका दलहरूबीच मतभेद देखिएको उल्लेख गर्दै प्रधानमन्त्रीले ती विषयलाई समाधान गर्न गम्भीर पहल गर्नुपर्ने धारणा राखे। “कुलिङ अफ पिरियडको मामिलामा कांग्रेसको स्पष्ट अडान छ, त्यसविपरीत एमालेले जबर्जस्ती अघि बढ्न खोजे गठबन्धनमै दरार आउन सक्छ,” उनले चेतावनी दिए।
उनले गठबन्धनलाई सफल बनाउन भन्दै कांग्रेसले सबै विषय सहजै स्वीकार गर्न नसक्ने स्पष्ट पारे। “सरकारलाई बलियो बनाउन गठबन्धनभित्रै सहकार्य हुनु जरूरी छ, तर कांग्रेसका मूल्य–मान्यता र विचार विपरीतका प्रस्ताव स्वीकार्य हुँदैनन्,” शर्माले भने।
कार्यक्रममा कांग्रेस प्रवक्ता डा. प्रकाशशरण महतले पनि गठबन्धन टिकाइ राख्न सबै दलले एक–अर्काको दृष्टिकोणप्रति सम्मानजनक व्यवहार गर्नु आवश्यक रहेको बताए। “सर्वसम्मतिबाट पारित गरिएको कुलिङ अफ पिरियड जस्तो विषयमा कांग्रेस पछि हट्दैन, जबर्जस्ती थोपर्न खोजियो भने स्वीकार्य हुँदैन,” महतले स्पष्ट पारे।
उनले भूमि विधेयकलगायतका अन्य महत्त्वपूर्ण विषयमा समेत एकलौटी निर्णयको प्रवृत्तिले गठबन्धनमा असन्तोष बढ्न सक्ने खतरा रहेको बताए।
महतले २०८४ सालसम्मको सत्ता साझेदारीलाई मजबुत पार्न अहिलेको सरकारलाई थप प्रभावकारी बनाउनुपर्नेमा जोड दिँदै संविधान संशोधनसम्बन्धी सहमति पनि कार्यान्वयनमा ल्याउनुपर्ने सुझाव दिए।
दुवै नेताले गठबन्धनलाई दीगो बनाउन पारदर्शिता, सम्मान र आपसी समन्वय अपरिहार्य रहेको स्पष्ट पारे।
प्रकाशित मिति: ६ श्रावण २०८२, मंगलबार
प्रतिक्रिया