जनकपुरधाम । धनुषाको बटेश्वर गाउँपालिका–५ शान्तिपुर स्थायी घर भई हाल जनकपुरधाम उपमहानगरपालिका–४ मा डेरा गरी बस्दै आएकी आमाछोरीमाथि सोमबार राति धारिलो हतियारले आक्रमण भएको छ ।
आक्रमणमा परेर १४ वर्षीया अञ्चली यादवको मृत्यु भएको छ भने उनकी आमा ३५ वर्षीया आशा यादव र आशासँगै बस्ने भतिजी राधा यादव घाइते भएका छन् ।
धारिलो हतियार (खुकुरी) बोकेर आएको व्यक्तिले राति घरमै आक्रमण गरेको जिल्ला प्रहरी कार्यालय धनुषाका प्रहरी निरीक्षक अनिल बैठाले जानकारी दिए ।
उनका अनुसार घटनामा संलग्न आक्रमणकारीको पहिचान भइसकेको छ र आवश्यक अनुसन्धान तथा प्रक्रियात्मक कारबाही अघि बढाइएको छ ।
घाइते दुबैको जनकपुरस्थित प्रादेशिक अस्पतालमा उपचार भइरहेको प्रहरीले जनाएको छ । घटनाको कारण खुल्न बाँकी भए पनि प्रारम्भिक अनुसन्धानका आधारमा व्यक्तिगत रिसइवीका कारण यस्तो हमला भएको हुनसक्ने आशंका गरिएको छ ।
प्रकाशित मिति: १३ श्रावण २०८२, मंगलबार
प्रतिक्रिया