काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ र उपमहासचिव जनार्दन शर्माबीच उत्पन्न अन्तरविरोध स्थायी समिति बैठकको औपचारिक एजेन्डा बनेको छ।
बुधवार पार्टी केन्द्रीय कार्यालयमा बसेको पदाधिकारी बैठकले संगठन निर्माण, नेतृत्व हस्तान्तरण, कार्यविभाजन र आन्तरिक एकता सुदृढीकरणजस्ता विषय स्थायी समितिमा विस्तृत छलफलका लागि लैजाने निर्णय गरेको हो।
पछिल्लो केन्द्रीय समिति बैठकले पारित गरेका निर्णयहरू कार्यान्वयन नभएकोप्रति असन्तुष्टि जनाउँदै उपमहासचिव शर्माले हालै सार्वजनिक रूपमै नेतृत्वप्रति टिप्पणी गरेका थिए। आन्तरिक जनवादको नाममा सार्वजनिक आरोप–प्रत्यारोप भएपछि पार्टीभित्रको असमझदारी सतहमा आएको हो।
बैठकपछि सञ्चारकर्मीहरूसँग बोल्दै माओवादी केन्द्रका प्रवक्ता अग्निप्रसाद सापकोटाले पार्टीभित्रको एकतालाई थप बलियो बनाउने विषय स्थायी समिति बैठकको नियमित एजेन्डा भएको बताए।
“संगठन निर्माण, कार्यविभाजन र आन्तरिक एकताको सुदृढीकरणबारे स्थायी समितिमा विस्तृत छलफल हुनेछ,” उनले भने, “आजको बैठकमा भने यसबारे प्रत्यक्ष छलफल भएको छैन।”
त्यस्तै, उपमहासचिव हरिबोल गजुरेलले पनि प्रचण्ड र शर्माबीच देखिएको अन्तरविरोध स्थायी समितिको एजेन्डा बनेको पुष्टि गरे।
पार्टीले आन्तरिक मतभेद व्यवस्थापन गर्दै एकताबद्ध ढंगमा अगाडि बढ्ने तयारी गरेको नेताहरूको भनाइ छ।
प्रकाशित मिति: १४ श्रावण २०८२, बुधबार
प्रतिक्रिया