काठमाडौं । संघीय निजामती सेवा विधेयकमा रहेको ‘कुलिङ अफ पिरियड’ सम्बन्धी विवादित व्यवस्थाबारे छानबिन गर्न गठित संसदीय विशेष समितिले आफ्नो प्रतिवेदन सभामुख देवराज घिमिरेलाई बुझाएको छ।
समितिका संयोजक सांसद जीवन परियारले मंगलबार सभामुखलाई प्रतिवेदन हस्तान्तरण गरेका हुन्। समितिले २९ दिनको अध्ययन र सरोकारवालासँगको छलफलपछि प्रतिवेदन तयार गरेको हो।
छानबिन प्रक्रियामा समितिको ३७ वटा बैठक बसेको थियो। गत असार २३ गते संघीय संसद्ले विधेयकमा भएको संशोधन प्रक्रियामा छेडछाड भएको भन्दै सात सदस्यीय समिति गठन गरेको थियो।
समितिमा नेपाली कांग्रेसबाट जीवन परियार र सुशीला थिङ, एमालेबाट ईश्वरी घर्ती र नारायणप्रसाद आचार्य, माओवादी केन्द्रबाट माधव सापकोटा, रास्वपाबाट गणेश पराजुली र राप्रपाबाट रोशन कार्की सहभागी थिए।
अब समितिको प्रतिवेदनलाई प्रतिनिधिसभामा टेबल गरिनेछ, जसपछि विधेयकमाथि थप निर्णय प्रक्रिया अघि बढ्नेछ।
प्रकाशित मिति: २० श्रावण २०८२, मंगलबार
प्रतिक्रिया