किन्नौर। मनसुनी वर्षाले भारतका पहाडी क्षेत्रमा गम्भीर विपत्तिहरू निम्त्याइरहेका छन्। बुधबार हिमाचल प्रदेशको किन्नौर जिल्लास्थित टाङ्लिङ क्षेत्रमा बादल फट्दा बाढी जस्तो अवस्था सिर्जना भएको छ।
सार्वजनिक भिडियो फुटेजमा पहाडबाट ठूला ढुङ्गा, माटो र भग्नावशेषको बाढी सडकमा खसिरहेको देखिन्छ। उक्त बाढीका कारण किन्नौर कैलाश तीर्थयात्रा मार्ग पूर्ण रूपमा क्षतिग्रस्त भएको छ। यात्रामा निस्किएका सयौं श्रद्धालुहरू बाटोमै अलपत्र परेका छन्।
भारत–तिब्बती सीमा प्रहरी (ITBP) को टोलीले डोरीको सहायताले करिब ४१३ तीर्थयात्रीहरूको सफल उद्धार गरेको छ। यात्रालाई हालका लागि स्थगित गरिएको छ।
यसअघि मंगलबार राति चण्डीगढ़–मनाली राष्ट्रिय राजमार्गमा पहिरो जाँदा यातायात पूर्णरूपमा अवरुद्ध भएको थियो। सडकमा ठूला ढुङ्गाहरू खसेका कारण हिमाचल प्रदेशभरि ५०० भन्दा बढी सडक मार्गहरू बन्द गरिएको राज्य सरकार स्रोतले जनाएको छ।
सिमला, मण्डी, सोलन र कुल्लु जिल्लाका विद्यालयहरू समेत सुरक्षाको दृष्टिकोणले बन्द गरिएका छन्।
यसैबीच, मंगलबार उत्तराखण्डको धराली गाउँमा पनि बादल फट्ने घटना हुँदा ठूलो जनधनको क्षति भएको छ। घटनामा ४ जनाको ज्यान गएको पुष्टि भएको छ भने ५० भन्दा बढी व्यक्ति अझै बेपत्ता छन्।
कर्णप्रयागमा पहिरो जाँदा बद्रीनाथ राष्ट्रिय राजमार्ग अवरुद्ध भएको छ। त्यसैगरी, हरिद्वार–देहरादून रेलमार्गमा पहाडबाट ढुङ्गा खस्दा रेल सेवा पनि रोकिएको छ।
वर्षाले निम्त्याएको यी प्राकृतिक प्रकोपले हिमाली क्षेत्रका जनजीवन अस्तव्यस्त बनाएको छ भने प्रशासन उद्धार तथा पुनःस्थापना कार्यमा खटिएको छ।
प्रकाशित मिति: २१ श्रावण २०८२, बुधबार
प्रतिक्रिया