काठमाडौं । नेकपा एमालेका महासचिव शंकर पोखरेलले पूर्वराष्ट्रपति विद्यादेवी भण्डारीलाई पार्टीको सदस्य नबनाउने निर्णय एमालेको गम्भीर र सम्मानजनक पहल भएको बताएका छन्। बुधबार राजधानीमा आयोजित एक कार्यक्रममा बोल्दै उनले पार्टीले राष्ट्रपतिको गरिमा जोगाउन सो निर्णय लिएको स्पष्ट पारे।
“विद्यादेवी भण्डारीलाई पार्टीको औपचारिक सदस्य बनाउने विषयमा बहस भए पनि एमालेले उहाँलाई देशकै अभिभावकको भूमिकामा रहन दिनुपर्ने ठानेको हो,” पोखरेलले भने, “यो निर्णय पार्टी, देश र उहाँकै हितमा गरिएको हो।”
उनले पूर्वराष्ट्रपतिलाई राजनीतिमा सक्रिय बनाउने कुरामा देखिएका टिप्पणी र आलोचनाप्रति आपत्ति जनाउँदै त्यस्ता अभिव्यक्तिहरू रोक्नुपर्ने आवश्यकता औंल्याए। “उहाँको गरिमा र सम्मानमा आँच आउने खालका टिप्पणीहरू कदापि स्वीकार्य छैनन्,” पोखरेलले जोड दिए।
महासचिव पोखरेलले केही समूहहरूले पूर्वराष्ट्रपति र एमालेबीच मतभेद भएको जस्तो देखाउन खोजेपनि त्यो भ्रम अब समाप्त भएको दाबी गरे। “पूर्वराष्ट्रपति भण्डारी र पार्टीबीच द्वन्द्व देखाउने प्रयास अब निष्क्रिय भइसकेको छ। एमालेको निर्णयले त्यो गलत धारणा चिर्दिएको छ,” उनले स्पष्ट पारे।
पोखरेलका अनुसार, एमालेको यो निर्णय न केवल राजनीतिक परिपक्वता हो, बरु राष्ट्रप्रमुख पदप्रतिको सम्मानपूर्ण व्यवहारको उदाहरण पनि हो।
प्रकाशित मिति: २१ श्रावण २०८२, बुधबार
प्रतिक्रिया