झडपपछि कैलाली कारागार कैदीहरूको कब्जामा

कारागारको अवस्था बुझ्न कैलालीका प्रमुख जिल्ला अधिकारी गोगन बहादुर हमाल, प्रहरी उपरीक्षक बालनसिह राणा, सशस्त्र प्रहरीका एसपी सुरेन्द्रराज रञ्जीत लगायत सुरक्षा अधिकारीहरू घटनास्थल पुगेका थिए। तर कैदीहरूले आक्रोश व्यक्त गर्दै सुरक्षाकर्मीलाई कारागारभित्र प्रवेश गर्न दिएका छैनन्।

जिल्ला सुरक्षा समितिले कारागार सुरक्षा कडा गर्न सशस्त्र प्रहरी परिचालन गरिसकेको छ।

यसैबीच, राष्ट्रिय मानवअधिकार आयोगको टोली पनि घटनास्थलसम्म पुग्न सकिरहेको छैन। आयोगका एक अधिकृतले जानकारी दिए, “हामी घटनाबारे जानकारी सङ्कलन गर्दैछौं। प्रशासन कार्यालयसम्म भने पुग्न सकेका छौं, तर कारागारभित्र जान पाएका छैनौं।”

झडपमा धनगढी उपमहानगरपालिका–४ का ४० वर्षीय भरत चौधरीको मृत्यु भएको छ भने ४९ जना घाइते भएका छन्।

मृतक चौधरीको शव सेती प्रादेशिक अस्पतालको शव गृहमा राखिएको छ भने घाइतेहरूलाई त्यही अस्पतालमा उपचार दिइरहेको छ। अस्पतालका वरिष्ठ फिजिसियन डा. शेरबहादुर कमरका अनुसार झडपमा फलामका रडहरू प्रचुर मात्रामा प्रयोग भएका कारण धेरै घाइतेका हातखुट्टा भाँचिएका छन्।

डा. कमरले भने, “फलामका रडहरूको प्रयोग धेरै भएको छ। घाइतेहरूको अवस्था जोखिममुक्त छ। एक जनाको शल्यक्रिया सकिएको छ भने अर्को एक जनालाई आईसियूमा राखिएको छ।”

सेती प्रादेशिक अस्पतालको इमर्जेन्सीमा उपचारका लागि स्थान अभाव भएपछि घाइतेहरूलाई नजिकै कोरोनाको समयमा बनाइएको अर्को भवनमा सारिएको छ।