काठमाडौं । नेकपा (एकीकृत समाजवादी) का अध्यक्ष माधवकुमार नेपाल र सम्मानित नेता झलनाथ खनालबीच केही दिनयता तीव्र बन्दै गएको आरोप–प्रत्यारोपबीच शनिबार पार्टी कार्यालय आलोकनगरमा भेटवार्ता भएको छ।
सो भेटमा वरिष्ठ उपाध्यक्ष राजेन्द्र पाण्डे, नेता बेदुराम भुसाल र महासचिव घनश्याम भुसाल साक्षीका रूपमा उपस्थित थिए।
हालै सार्वजनिक रूपमा एकअर्कालाई पार्टी छोड्ने सुझावसम्म दिँदै आएका दुई शीर्ष नेतालाई संवादमा ल्याउने पहल पाण्डे, भुसाल र हमालले गरेका हुन्। “पार्टीभित्रको समस्या संवादबाटै समाधान गर्नुपर्छ भन्ने विश्वासका आधारमा नेताद्वयलाई एउटै टेबलमा बसालिएको हो,” एक नेताले जानकारी दिए। “भेटमा दुवै नेताले पछिल्ला अभिव्यक्तिहरूको स्पष्टीकरण दिनुभयो।”
सम्प्रति विवादको सुरुआत खनालले एमाले विभाजनको औचित्य अझै पुष्टि हुन नसकेको धारणा सार्वजनिक गरेपछि भएको हो। त्यसको जवाफमा अध्यक्ष नेपालले खनाललाई पार्टीमा बस्ने नैतिक अधिकार नभएको भन्दै राजीनामा दिन खुलेर आग्रह गरेका थिए।
खनालले त्यसको प्रतिवाद गर्दै, बरु अध्यक्ष नेपालले नै पदबाट राजीनामा दिनुपर्ने टिप्पणी गरेका थिए। शुक्रबारमात्र अध्यक्ष नेपालले खनाललाई “विद्रोहको औचित्य नभए ओलीको सेवा गरेर बस्न” सुझाव दिएका थिए।
पार्टीनिकट व्यवसायीको कार्यक्रममा बोल्दै अध्यक्ष नेपालले खनालले मिडियामा गएर विद्रोहको औचित्य छैन भनी पार्टीको छवि बिगारेको आरोप लगाए। “मिडियामा गएर पार्टीको बदख्वाइँ गर्ने, विद्रोह ठीक लागेन भन्ने—यदि त्यस्तो हो भने केपी ओलीजीको सेवा गरेर बसे हुन्छ,” नेपालको भनाइ थियो।
भेटवार्तामा खनालले आफ्नो पुरानै भनाइ दोहोर्याउँदै, “एमालेसँग विद्रोहको पुष्टि गर्न हामीले अझ गम्भीर कदम चाल्नुपर्छ, यसमा नयाँ कुरा केही जोडेको छैन” भनेका थिए। साथै, अध्यक्ष नेपालको राजीनामाको सुझावलाई अस्वीकार गर्दै त्यसप्रति असन्तुष्टि जनाए।
नेपालले भने चौतर्फी आक्रमणका बीच औचित्य पुष्टि भएन भन्ने कुरा पार्टीलाई थप कमजोर बनाउने प्रयास भएको भन्दै खनालप्रति आक्रोश पोखेका थिए।
यसबीच, भदौ ७ र ८ गतेका लागि तय भएको पार्टीको केन्द्रीय कमिटी बैठक २० दिन पछि सारिएको छ। नयाँ मिति भदौ २७ र २८ गते तय गरिएको केन्द्रीय प्रचार विभागका उपप्रमुख दामोदर अर्यालले बताए।
उनका अनुसार बैठक सार्ने मुख्य कारण तीज पर्व भदौ पहिलो सातामा पर्नु हो, जसले महिलाहरूलाई असुविधा पुर्याउने थियो। साथै, सो अवधिमा महासचिव घनश्याम भुसाल जापान र सम्मानित नेता झलनाथ खनाल अमेरिका भ्रमणमा रहने भएकाले मिति परिवर्तन गरिएको हो। “तीजको माहौल र नेताहरूको विदेश भ्रमणलाई ध्यानमा राखेर बैठक सारिएको हो,” अर्यालले स्पष्ट पारे।
प्रकाशित मिति: २५ श्रावण २०८२, आइतबार
प्रतिक्रिया