काठमाडाैं । उत्तर कोरियाले दक्षिण कोरिया र संयुक्त राज्य अमेरिकाबीच हुन लागेको आगामी संयुक्त सैन्य अभ्यासलाई लिएर कडा चेतावनी जारी गरेको छ। उत्तर कोरियाका रक्षामन्त्री नो क्वाङ चोलले सोमबार सरकारी मिडियामा भनेका छन् कि यदि संयुक्त अभ्यासले कुनै पनि प्रकारको तनाव वा उत्तेजना सिर्जना गर्यो भने, उनीहरू ‘दृढ जवाफी कारबाही’ गर्नेछन्।
सियोल र वासिङ्टनले आगामी अगस्ट १८ देखि २१ सम्म आफ्नो वार्षिक ‘उल्ची फ्रिडम सिल्ड’ नामक सैन्य अभ्यास गर्ने तयारी गरिरहेका छन्। यो अभ्यास मुख्य रूपमा आणविक क्षमतासम्पन्न उत्तर कोरियालाई नियन्त्रण गर्ने उद्देश्यले गरिन्छ।
उत्तर कोरियाले सन् १९५० मा दक्षिण कोरियामाथि गरेको आक्रमणपछि सुरु भएको कोरियाली युद्धदेखि नै अमेरिकाको दक्षिण कोरिया सँगको संयुक्त सैन्य अभ्यासलाई आक्रमणको पूर्वाभ्यास भनेर विरोध गर्दै आएको छ।
नो क्वाङ चोलले जारी गरेको विज्ञप्तिमा भनिएको छ, “हाम्रो सशस्त्र सेना संयुक्त अभ्यासलाई आत्मरक्षाको अधिकारका रुपमा लिनेछ र आवश्यक परे दृढ र कडा जवाफ दिनेछ।”
अमेरिकाले दक्षिण कोरियामा करिब २८,५०० सैनिक तैनाथ गरेको छ भने दुई देश नियमित रूपमा संयुक्त अभ्यास गर्दै आएका छन्। यी अभ्यासहरू रक्षात्मक प्रकृतिका भएको दाबी गरिन्छ।
त्यस्तै, पछिल्लो समय दुई कोरियाबीच सम्बन्ध सुधारका प्रयास देखिएका छन्। सन् २०१८ को पछि सीमामा प्रयोग हुँदै आएका प्रचार प्रसारणका लाउडस्पिकरहरू हटाउन सुरु गरिएको छ। सियोल सरकारले नयाँ प्रशासनको नेतृत्वमा यी लाउडस्पिकरहरू भत्काइसकेको छ भने उत्तर कोरियाले पनि प्रोपागान्डा उपकरणहरू नष्ट गर्न थालेको छ।
प्योङयाङसँगको तनाव कम गर्न खोज्दै दक्षिण कोरियाका नयाँ राष्ट्रपति ली जे म्युङले चुनावपछि फरक दृष्टिकोण अपनाएका छन्। उनले नागरिक समूहहरूलाई सीमा पारबाट प्रचार सामग्री पठाउनबाट रोक लगाउन समेत अनुरोध गरेका छन्।
यता, पूर्व राष्ट्रपति युन सुक योलको शासनकालमा दुई कोरियाबीचको सम्बन्ध धेरै तल पुगेको थियो र सियोलले प्योङयाङप्रति कडा रुख देखाएको थियो। यसैबीच, उत्तर कोरियाले युक्रेन संकटमा रूससँग निकटता बढाएको देखिन्छ।
यी सबै घटनाक्रमबीच आगामी संयुक्त सैन्य अभ्यासले द्विपक्षीय सम्बन्धमा नयाँ तनाव थप्ने कि शान्ति र संवादको बाटो खोल्ने भन्ने विषय सबैको नजरमा छ।
प्रकाशित मिति: २६ श्रावण २०८२, सोमबार
प्रतिक्रिया