काठमाडौँ । नेकपा एमालेका अध्यक्ष तथा प्रधानमन्त्री केपी शर्मा ओलीले मदन भण्डारी फाउन्डेसन पार्टीले स्थापना गरेको नभई व्यक्तिगत स्वार्थका आधारमा बनेको बताएका छन्।
सोमबार च्यासलमा आयोजित मदन आश्रित स्मृति प्रतिष्ठानको कार्यक्रममा ओलीले पार्टीका प्रतिष्ठानहरू सामूहिक हुनुपर्ने तर केहीले तिनलाई कब्जामा लिएर आफ्नो स्वार्थ सिद्ध गर्न खोजेको आरोप लगाए। उनले भने, “पार्टीले पुष्पलाल, मनमोहन लगायतका प्रतिष्ठान स्थापना गर्यो, तर पछि केही व्यक्तिहरूले त्यस्ता संस्थालाई आफ्नो नियन्त्रणमा लिएर काम गर्नेहरूलाई नियन्त्रणमा राख्ने प्रयास गरे।”
ओलीले मदन भण्डारी फाउन्डेसनलाई पनि यसैगरी आफूखुशी बनाइएको बताए। उनले भने, “मदन आश्रित स्मृति मनाउन नपाइने अवस्था सिर्जना भयो, त्यसपछि केही विकृतिपूर्ण लेखहरु लिडरसिपबाट निकालिए र मदन भण्डारी फाउन्डेसन जन्मियो।”
उनले फाउन्डेसनको आगामी भविष्यप्रति शंका व्यक्त गर्दै यसले परिवार वा व्यक्तिका लागि काम गरिरहेको कि आन्दोलनका लागि भन्ने स्पष्ट नभएको बताए। ओलीले कम्युनिस्ट पाठशाला जस्ता संस्था पनि व्यक्तिगत स्वार्थका लागि प्रयोग भइरहेको आरोप लगाए र आन्दोलनको नाममा ठगी गर्नु स्वीकार्य नभएको स्पष्ट पारे।
मदन भण्डारी फाउन्डेसनको संरक्षक पूर्वराष्ट्रपति विद्यादेवी भण्डारी तथा अध्यक्ष उनकी छोरी उषाकिरण भण्डारी रहेका छन्। प्रधानमन्त्री ओलीको यस टिप्पणीले पार्टी भित्र यस विषयमा थप बहस हुने सम्भावना देखिन्छ।
प्रकाशित मिति: २६ श्रावण २०८२, सोमबार
प्रतिक्रिया