काठमाडौं । राष्ट्रिय मुक्ति पार्टीले कैलाली कारागारभित्र भएको हिंसात्मक झडपको जिम्मा सरकारको लापरवाहीलाई ठहर गरेको छ। झडपमा परेर भरत चौधरीको ज्यान गएको र ४८ जना कैदीबन्दी घाइते भएको घटनापछि पार्टीले गम्भीर सुरक्षा कमजोरी देखाएको आरोप लगाएको हो।
पार्टीका प्रवक्ता रवीन्द्र कुमार श्रेष्ठले जारी गरेको विज्ञप्तिमा भनिएको छ, “कारागार प्रशासनको सुरक्षा लापरवाही र राज्यको उदासीनताले एउटा जीवन समयअगावै समाप्त भयो। सुरक्षा नियन्त्रण भित्रै नागरिक असुरक्षित हुनु गृह प्रशासनको चरम लापरवाही हो।”
पार्टीले यो घटनालाई ‘अचानक भएको झडप’ भन्दै ढाकछोप गर्न खोज्ने प्रयास अस्वीकार गर्ने चेतावनी दिएको छ। श्रेष्ठका अनुसार, ५९० भन्दा बढी कैदीबन्दीको हस्ताक्षरसहित सुरक्षा अभाव र बढ्दो तनावबारे राज्यलाई पहिले नै जानकारी दिइए पनि आवश्यक सतर्कता र व्यवस्थापनको कदम नचालिएको हो।
विज्ञप्तिमा भनिएको छ, “यो केवल दुर्भाग्य होइन, बरु गम्भीर लापरवाही र संवेदनहीनताको परिणाम हो। यसको सम्पूर्ण जिम्मेवारी गृह प्रशासनले लिनुपर्छ।”
प्रकाशित मिति: २६ श्रावण २०८२, सोमबार
प्रतिक्रिया