भारी मनसुनी वर्षाले उत्तरी पाकिस्तानमा बाढी र आकस्मिक डुबान निम्त्याउदा कम्तिमा ५० जनाको मृत्यु हुनुका साथै अन्य धेरै जना बाढीका कारण भत्किएका घरको भग्नावशेषमा फसेको विपद् व्यवस्थापन निकायका अधिकारीहरूले शुक्रबार बताएका छन् ।
खैबर पख्तुनख्वा प्रान्तमा विगत २४ घण्टामा कम्तीमा २३ जनाको तथा कश्मीरमा सात जनाको मृत्यु भएको क्षेत्रीय विपद् व्यवस्थापन अधिकारीहरूले पुष्टि गरेका छन् ।
बाढीले उत्तरपश्चिमी बाजौर जिल्लामा धेरै घरहरू बगाएको छ भने त्यहाँ उँदा १६ जनाको मृत्यु भएको छ र २० जनाभन्दा बढी भग्नाबशेसमा फसेको प्रान्तीय प्रकोप व्यवस्थापन निकायलाई उदृत गर्दै एएफपीले बताएको छ ।
मौसम विज्ञान विभागले उत्तरपश्चिम क्षेत्रमा भारी वर्षाको चेतावनी पनि जारी गर्दै मानिसहरूलाई ‘जोखिम’ क्षेत्रमा नजान आग्रह गरेको छ ।
वार्षिक मनसुनीे मौसमले दक्षिण एसियामा ७० देखि ८० प्रतिशत वर्षा हुने हुनाले कृषि र खाद्य सुरक्षालगायतका क्षेत्रलाई सकारात्मक योगदान पुर्याउँछ ।
पाकिस्तानमा यसअघि सन् २०२२ मा आएको मनसुनी बाढीले देशको एक तिहाइ भाग डुबाउदा एक हजार ७०० जनाको मृत्यु भएको थियो।
- एजेन्सी
प्रकाशित मिति: ३० श्रावण २०८२, शुक्रबार
प्रतिक्रिया