स्याङ्जा । स्याङ्जामा कुटपिटबाट एकजनाको मृत्यु भएको छ । वालिङ नगरपालिका–५, बाहुनडाँडाका ३२ वर्षीय ढालबहादुर थापाको मृत्यु भएको जिल्ला प्रहरी कार्यालयका सूचना अधिकारी प्रसन्नराज चौधरीले जानकारी दिए ।
उनका अनुसार, शनिबार (भदौ ७) राति करिब ११ बजे थापामाथि कुटपिट गरिएको थियो । त्यसपछि वालिङस्थित गह्रौँ प्राथमिक अस्पतालमा उनको उपचार गरिएको थियो । थप उपचारका निम्ति उनलाई गण्डकी मेडिकल कलेज पोखरा लगिएकामा चिकित्सकले राति नै मृत घोषणा गरेका थिए ।
प्रहरीले घटनामा संलग्न दुईजनालाई नियन्त्रणमा लिइएको जनाएको छ । नियन्त्रणमा लिइएकामा हरिनाश गाउँपालिका–५ का २२ वर्षीय सिजन थापा र चापाकोट नगरपालिका–५ का २४ वर्षीय अनिल शाही रहेका चौधरीले जानकारी दिए ।
प्रहरीले घटनाका सम्बन्धमा अनुसन्धान सुरु गरिसकेको जनाएको छ ।
प्रकाशित मिति: ८ भाद्र २०८२, आइतबार
प्रतिक्रिया