काठमाडाैं । अमेरिकी राष्ट्रपति डोनाल्ड ट्रम्पले मङ्गलबार अमेरिकाले चीनका करिब छ लाख विद्यार्थीलाई प्रवेश दिने घोषणा गरेका छन्।
चीनसँग चलिरहेको भन्सार शुल्कसम्बन्धी वार्ताको सन्दर्भमा उनले चिनियाँ विद्यार्थीहरूको उपस्थितिलाई आवश्यक र महत्त्वपूर्ण भन्दै भने, “हामी उनीहरूलाई रोक्छौं भन्ने धेरै अफवाह सुनेको छु, तर यो सत्य होइन। हामी उनीहरूलाई अमेरिका आउन दिनेछौं। यो ठूलो कुरा हो—छ लाख विद्यार्थी।”
ट्रम्पले चीनसँगको सम्बन्ध सकारात्मक दिशामा जाने विश्वास व्यक्त गरे। “राष्ट्रपति सीले मलाई चीन बोलाउन चाहनुभएको छ। यो निकै महत्त्वपूर्ण सम्बन्ध हो। हामी चीनसँग व्यापारमार्फत ठूलो रकम उठाइरहेका छौं, तर अन्ततः हामी राम्रो सम्बन्ध कायम गर्नेछौं,” उनले बताए।
उनका अनुसार, अहिलेको चीन–अमेरिका आर्थिक सम्बन्ध अघिल्लो बाइडेन प्रशासनको तुलनामा बलियो छ। यस वर्ष सुरुमा अमेरिकाले सबै चिनियाँ सामानमा १४५ प्रतिशत कर लगाएको थियो, जसको जवाफमा चीनले अमेरिकी निर्यातमा १२५ प्रतिशत कर लगाएको थियो।
जेनेभामा गत मे महिनामा वार्ताकारहरूले अतिरिक्त करहरू रोकिने सहमति गरेका थिए। तर ट्रम्पले चेतावनी जारी राख्दै, गत सातामात्रै चिनियाँ म्याग्नेटमा २०० प्रतिशत कर लगाउने घोषणा गरेका थिए। उनले म्याग्नेट क्षेत्रमा चीनलाई विश्व बजारमा “एकाधिकार” बनाएको आरोप समेत लगाए।
“यसमा गम्भीर समस्या आउँदैन,” उनले पत्रकारलाई भने, “चीनले म्याग्नेट बजारमा रणनीतिक रूपमा नियन्त्रण जमाएको छ। त्यसलाई प्रतिस्थापन गर्न सम्भवतः एक वर्ष लाग्न सक्छ।”
फक्स न्युजका अनुसार, हाल करिब दुई लाख ७० हजार चिनियाँ विद्यार्थी अमेरिकी विश्वविद्यालयहरूमा अध्ययनरत छन्।
यसबीच, गत मे महिनामा अमेरिकी विदेशमन्त्री मार्को रुबियोले चिनियाँ नागरिक, विशेषगरी कम्युनिस्ट पार्टीका सदस्य वा संवेदनशील अनुसन्धान क्षेत्रमा संलग्न व्यक्तिहरूको भिसा कडाइका साथ रद्द गर्ने योजना सार्वजनिक गरेका थिए।
तर ट्रम्पले पछिल्लो समय बारम्बार चीनबाट विद्यार्थी स्वागत गर्ने पक्षमा आफू निरन्तर रहेको स्पष्ट पारेका छन्।
प्रकाशित मिति: १० भाद्र २०८२, मंगलबार
प्रतिक्रिया