काठमाडौं । राष्ट्रिय स्वतन्त्र पार्टी (रास्वपा)ले भिजिट भिसा प्रकरणमा ९५ दिनदेखि सदनमा ध्यानाकर्षण गराउन खोज्दा पनि सरकारले उनीहरूको माग नसुनेको बताएको छ।
बुधबार प्रतिनिधि सभाको बैठक सुरु हुनासाथ सभामुख देवराज घिमिरेले समय दिएका रास्वपाका सांसद हरि ढकालले भिजिट भिसा प्रकरणका विषयमा पार्टीको माग यथावत रहेको बताए। उनले आरोप लगाए कि प्रकरण उठाउँदा उल्टै उनीहरूमाथि झुटा आरोप लगाइन्छ र सत्ता पक्षले २ मिनेटको बोलाइलाई बंग्याउन घण्टौं समय खर्च गरिरहेको छ।
सांसद ढकालले भने, ‘अख्तियार दुरुपयोग अनुसन्धान आयोग पनि दलीयकरणमा परेको छ। ०८४ पछि यस्तो अवस्था कहिल्यै नहोस्।’ उनले राणा शासनको समय सम्झँदै, लोकतन्त्रमा पनि विरोध गर्ने आवाजलाई दबाइँने परम्परा जारी रहेको आरोप लगाए।
उनीहरूले भिजिट भिसा प्रकरणमा उच्चस्तरीय छानबिन समिति गठन गर्नुपर्ने माग राख्दै बहसमा विरोध जनाएका थिए। रास्वपाका सांसद ढकाल र राप्रपाका प्रमुख सचेतक ज्ञानबहादुर शाहीले प्रतिनिधि सभाको बैठक बहिष्कार गरेका छन्। सांसद शाहीले पनि निरन्तर उठाइरहेको मागको सुनुवाइ नभएकोमा आपत्ति जनाएका छन्।
प्रकाशित मिति: १८ भाद्र २०८२, बुधबार
प्रतिक्रिया