भूकम्पमा परी अफगानिस्तानमा मृत्यु हुनेको संख्या २२ सय कट्यो

काठमाडौं । अफगानिस्तानमा गएको भीषण भूकम्पमा ज्यान गुमाउनेको संख्या २ हजार २०० नाघेको छ। गत आइतबार मध्यरात पाकिस्तानसँग सीमा जोडिएको नांगरहार प्रान्तको जलालाबाद सहरबाट करिब १७ किलोमिटर उत्तर–पूर्वी क्षेत्रमा केन्द्रबिन्दु बनेर ६ म्याग्निच्युडको भूकम्प गएको थियो।

तालिबानी प्रशासनका अधिकारीलाई उद्धृत गर्दै अन्तर्राष्ट्रिय समाचार संस्था रोयटर्सले बिहीबारसम्म मृत्यु संख्या २ हजार २०५ पुगेको जनाएको छ। घाइतेहरूको संख्या ३ हजार ५०० भन्दा धेरै पुगेको छ, जसमा धेरैजना गम्भीर अवस्थामा भएकाले मृतक संख्या अझै बढ्न सक्ने अनुमान गरिएको छ।

मुख्य भूकम्पपछि निरन्तर पराकम्पनहरू आइरहेका छन्। मंगलबार ५.५ म्याग्निच्युड र बिहीबार राति ८:५६ बजे ५.६ म्याग्निच्युडको पराकम्पन गएको थियो। पछिल्लो कम्पनबाट थप मानवीय क्षति भएको रिपोर्ट भने आएको छैन। तर कुनार र नांगरहारका स्थानीय बासिन्दा सुरक्षाका लागि घर र अस्थायी आश्रयस्थल छोडेर बाहिर निस्किएका थिए।

लगातार आएका तीव्र पराकम्पनका कारण राहत तथा उद्धार कार्यमा कठिनाइ बढेको अधिकारीहरूले बताएका छन्।

प्रकाशित मिति: २० भाद्र २०८२, शुक्रबार