काठमाडौं । नेपाली कांग्रेसका महामन्त्री गगन थापाले मुलुकभित्रै पर्याप्त रोजगारी सिर्जना गरी युवालाई विदेश जान बाध्य हुने अवस्थाबाट मुक्त गराउनुपर्ने आवश्यकता औंल्याएका छन्। शनिबार राजधानीमा आयोजित कार्यक्रममा बोल्दै उनले भौतिक पूर्वाधार विस्तारसँगै जनताको अपेक्षा पनि तीव्र गतिमा बढिरहेको बताउँदै अब त्यसअनुरूप रोजगारीको अवसर सिर्जना गर्नुपर्ने धारणा राखे।
थापाका अनुसार, ठूलो संख्यामा युवा रोजगारीका लागि विदेशिनु देशका लागि गम्भीर चुनौती हो। उनले भने, ‘पूर्वाधार बनेको छ, विकास भएको छ, समाजमा परिवर्तन आएको छ, र त्यससँगै मान्छेहरूको आकांक्षा स्वाभाविक रूपमा बढेको छ। अब हामीले नेपालमै आकर्षक र उच्च आम्दानी हुने रोजगारी सिर्जना गर्नैपर्छ।’
विदेशमा श्रम गरेर नेपालीले राम्रो आम्दानी गरिरहेको उदाहरण दिँदै उनले नेपालमा पनि प्रतिस्पर्धी अवसर उपलब्ध गराउनुपर्नेमा जोड दिए। उनका अनुसार, अहिले हरेक वर्ष कम्तीमा पाँच लाख गुणस्तरीय रोजगारी सिर्जना गर्न जरुरी छ। “सामान्य रोजगारीले मात्र पुग्दैन, राम्रो आम्दानी दिलाउने पेशा सिर्जना गर्नुपर्छ,” उनले स्पष्ट पारे।
थापाले कांग्रेसले युवालाई देशमै बस्ने वातावरण बनाउन आफ्नो सम्पूर्ण ध्यान केन्द्रित गर्नुपर्ने बताए। उनका अनुसार, सरकारमा टिक्नु वा सत्तामा रहनु भन्दा नेपालीलाई रोजगारी र समृद्ध भविष्य दिलाउनु पार्टीको प्रमुख ध्येय हुनुपर्छ। ‘मैले देखेको यो सपना नागरिककै सपना हो, र यो पूरा गर्ने दृढ संकल्प कांग्रेसले गर्नुपर्छ भन्नेमा म प्रतिबद्ध छु,’ उनले भने।
बीपी कोइरालाले नेपालीलाई गरिबीको चक्रबाट बाहिर निकाल्ने लक्ष्य राखेको स्मरण गर्दै थापाले आजको कांग्रेसले युवालाई आफ्नै मातृभूमिमा सुरक्षित र समृद्ध भविष्य दिने मार्गचित्र तय गर्नुपर्ने आवश्यकता जोड दिए।
प्रकाशित मिति: २१ भाद्र २०८२, शनिबार
प्रतिक्रिया