काठमाडौं । राजधानीको नयाँ बानेश्वर सडक क्षेत्रमा पुनः प्रदर्शनकारी भेला भएका छन्। केही समयअघि सुरक्षा निकायले नियन्त्रणमा लिएको भनिएको क्षेत्रमा फेरि ठूलो संख्यामा प्रदर्शनकारीको उपस्थितिले वातावरण तनावग्रस्त बनेको हो।
सोमबार बिहान माइतीघर मण्डलाबाट शान्तिपूर्ण रुपमा सुरु भएको ‘जेन जेड’ को आन्दोलन बानेश्वर पुग्दा हिंसात्मक रुप लिएको थियो। संसद् भवनतर्फ अघि बढेका प्रदर्शनकारीले तोडफोड गर्दै प्रवेश गर्ने प्रयास गरेपछि प्रहरीले गोली चलाएको थियो।
प्रहरीको गोली लागेर हालसम्म १८ जनाको मृत्यु भएको पुष्टि भएको छ भने २०० भन्दा बढी घाइतेको काठमाडौंका विभिन्न अस्पतालमा उपचार भइरहेको छ।
दिनभर तनावग्रस्त बनेको बानेश्वर क्षेत्रमा प्रशासनले दिउँसो कर्फ्यु आदेश जारी गरेको थियो। तर आदेशको अवज्ञा गर्दै बेलुकीपख पनि प्रदर्शनकारीले सडकमा नाराबाजी र प्रदर्शनलाई निरन्तरता दिएका छन्।
प्रकाशित मिति: २३ भाद्र २०८२, सोमबार
प्रतिक्रिया