काठमाडौं । नेपाली सेनाले बुधबार साँझसम्म देशभरबाट ७३ नाल हतियार बरामद गरेको जनाएको छ।
सेनाको जनसम्पर्क तथा सूचना निर्देशनालयका अनुसार मंगलबार राति देखि बुधबार साँझ ५ बजेसम्म विभिन्न स्थानबाट यी हतियारहरू सङ्कलन गरिएको हो। बुधबार मात्रै सात नाल हतियार र ती हतियारसँग सम्बन्धित म्यागेजिन तथा अन्य एसेसरिज बरामद भएको बताइएको छ।
विशेष सूचनाका आधारमा माछापोखरी क्षेत्रबाट एक नाल हतियार पनि बरामद गरिएको छ। त्यस्तै, काठमाडौंको महाराजगन्ज क्षेत्रमा लुटपाटमा संलग्न चार जनालाई सेनाले पक्राउ गरेको छ।
काभ्रेको जिल्ला कारागारमा कैदीबन्दी र नेपाल प्रहरीबीच भएको झडप सेनाले नियन्त्रणमा लिएको छ। डिल्लीबजार कारागारमा लागेको आगो पनि नेपाली सेना तथा अन्य निकायको प्रयासमा नियन्त्रणमा आएको निर्देशनालयले जनाएको छ।
सुरक्षा फौजले विभिन्न जिल्लाबाट फरार भएका कैदीबन्दीमध्ये सप्तरीमा ४, सुनसरीमा २०२, रुकुम (पश्चिम)मा ४३, कपिलवस्तुमा ५० र म्याग्दीमा ४ गरी जम्मा ३०३ जनालाई नियन्त्रणमा लिएको छ।
प्रकाशित मिति: २५ भाद्र २०८२, बुधबार
प्रतिक्रिया