बीपी राजमार्ग आजदेखि २४ घण्टा सञ्चालन

काठमाडौं । मनसुनको मौसममा जोखिमका कारण राति सवारीसाधनको सञ्चालनमा रोक लगाइएको बीपी राजमार्गलाई आजदेखि २४ घण्टा सञ्चालनमा ल्याइएको छ। काभ्रेपलाञ्चोक जिल्लास्थित प्रशासन कार्यालयमा सोमबार भएको सुरक्षा समितिको बैठकमा मनसुन समाप्त हुँदै गएको र आगामी चाडपर्वहरूलाई ध्यानमा राख्दै सडकलाई २४ घण्टा सञ्चालन गर्ने निर्णय गरिएको हो।

समितिले यात्रुहरूको सहजताका लागि सडक सुरक्षामा आवश्यक सतर्कता अपनाउन र स्वीकृत सडक सुरक्षा योजनाबमोजिम निर्णय लिएको जानकारी दिएको छ।

सोमबार जारी गरिएको सार्वजनिक सूचनाअनुसार, यसअघि असार महिनाको पहिलो हप्तादेखि रातको समयमा सवारी सञ्चालनमा रोक लगाइएको थियो। मनसुनको बाढी र पहिरोको जोखिमका कारण काभ्रेपलाञ्चोकको धुलिखेलदेखि सिन्धुलीको नेपालथोकसम्म १२ घण्टासम्म यातायात रोक लगाइएको थियो। यसअघि भदौ १६ देखि थप १५ दिनका लागि सवारी सञ्चालनमा रोक लगाइएको थियो।

मनसुनमा बाढी र पहिरोको उच्च जोखिमका कारण बीपी राजमार्गमा राति सवारी संचालनमा रोक लगाइएको थियो। गत वर्ष असोज महिनामा बाढी र पहिरोले काभ्रेपलाञ्चोकको चौकीडाँडाबाट सिन्धुलीको वर्षेखोलासम्म आठ किलोमिटर सडक बगाएपछि अस्थायी सवारी व्यवस्था गरिएको थियो। यस घटनाबाट राजमार्गको १६० किलोमिटर क्षेत्रमध्ये ३४ किमी सिन्धुलीको खुर्कोटदेखि नेपालथोक र ५० किमी काभ्रेपलाञ्चोकको धुलिखेलसम्मका खण्डमा क्षति पुगेको थियो।

यसैबीच, क्षतिग्रस्त सडकको स्थायी निर्माणको प्रक्रिया अघि बढाइएको छ। यस राजमार्गले पूर्वी नेपालसँगको छोटो दूरीको जडानको रूपमा दैनिक हजारौं सवारीसाधनलाई सेवा प्रदान गर्दै आएको छ।