देशमा व्याप्त राजनीतिक अस्थिरता, प्रशासनिक चुनौती र जन-असन्तोष बीच नयाँ समाधान खोज्ने उद्देश्यका साथ आगामी असोज ७ गते ‘वैकल्पिक सोच: अबको निकास के?’ नामक एक महत्त्वपूर्ण संवाद कार्यक्रम सुरु हुदैछ। बसुन्धरा स्थित साउथ वेस्ट्रर्न स्टेट कलेज हलमा आयोजना हुने यस कार्यक्रमलाई ‘युनिभर्सिटी अफ थ्री जेनेरेसन’ र ‘इगल थिङ्क ट्याङ्क’ ले संयुक्त रूपमा आयोजना गर्नेछन्। यसको मुख्य लक्ष्य नेपालले सामना गरि रहेका विभिन्न चुनौतीहरूको लागि कार्यान्वयन योग्य र दीर्घकालीन समाधानहरू पहिचान गर्नु रहनेछ। आयोजक संस्थाहरूले आफ्नै निजी स्रोतबाट यो कार्यक्रम सञ्चालन गर्नेछन्।
कार्यक्रमको प्रारम्भ हालैको ‘जेन जेड’ आन्दोलनका दिवंगत आत्माहरूको सम्मानमा मौन धारण र घाइतेहरूको शीघ्र स्वास्थ्य लाभको कामना सहित गरिनेछ। त्यसपछि आगामी बडादशैं, तिहार र छठ पर्वहरूको शुभकामना आदानप्रदान गरिनेछ। यस कार्यक्रममा शिक्षा, संविधान, प्रशासन, सुरक्षा र प्रहरी जस्ता संवेदनशील क्षेत्रका पाँच जना विशिष्ट व्यक्तित्वहरूले आ-आफ्नो विषयमा रोडम्याप प्रस्तुत गर्नेछन्। यसमा डा. राजेन्द्र के.सी. (शैक्षिक रोडम्याप), डा. सुरेन्द्र भण्डारी (संवैधानिक रोडम्याप), पूर्व सचिव कृष्णहरी बास्कोटा (प्रशासनिक रोडम्याप), पूर्व ब्रिगेडियर डा. केशरबहादुर भण्डारी (सुरक्षा रोडम्याप) र पूर्व एआईजीपी विज्ञानराज शर्मा (प्रहरी रोडम्याप) रहनेछन्।
कार्यक्रममा प्रस्तुत गरिने रोडम्यापहरूले हालको संकटलाई सम्बोधन गर्न रचनात्मक र कार्यान्वयन योग्य विकल्पहरूमाथि जोड दिनेछ। ‘युनिभर्सिटी अफ थ्री जेनेरेसन’ ले पुस्ता–पुस्ता बीच बौद्धिक संवाद प्रवर्द्धन गर्ने उद्देश्य राखेको छ भने ‘इगल थिङ्क ट्याङ्क’ सुरक्षा, कूटनीति, र नेतृत्व विकासका माध्यमबाट राष्ट्रिय हितको संरक्षण गर्न समर्पित छ। यी दुई संस्थाको सहकार्यमा हुने यो कार्यक्रमले नेपालको विकास र स्थिरताका लागि ठोस रणनीतिको खाका तयार पार्ने विश्वास लिइएको छ।
विशेषज्ञहरूले प्रस्तुत गर्ने रोडम्यापहरू र छलफलबाट निस्केका निष्कर्षहरूलाई भविष्यमा सम्बन्धित सरकारी निकायहरू र सर्वसाधारण माझ पनि उपयुक्त माध्यमबाट पुर्याइनेछ। यस कार्यक्रमले विभिन्न क्षेत्रका विज्ञहरूलाई एकै ठाउँमा भेला गरी देशको हितमा सामूहिक सोच र सहकार्यको वातावरण सिर्जना गर्ने अपेक्षा गरिएको छ। कार्यक्रमको समापन ग्रुप फोटो सेसन र सबै सहभागीहरूलाई धन्यवाद ज्ञापन सहित हुनेछ।
प्रकाशित मिति: ३ आश्विन २०८२, शुक्रबार
प्रतिक्रिया