बारा । प्रहरीले हेटौंडा–वीरगञ्ज सडकखण्ड अन्तर्गत अमलेखगञ्जबाट ठूलो परिमाणमा लागूऔषध गाँजासहित एक जनालाई पक्राउ गरेको छ।
जितपुरसिमरा उपमहानगरपालिका–२१, अमलेखगञ्जमा विशेष सूचनाको आधारमा खटिएको प्रहरीले मकवानपुरबाट वीरगञ्जतर्फ आउँदै गरेको बा २ ख ९५६९ नम्बरको मिनि ट्रक रोकी जाँच गर्दा दुई क्विन्टल ३६ किलो गाँजा बरामद गरेको हो।
प्रहरीका अनुसार, ट्रकको छतमा फल्स बटम बनाएर लुकाई राखिएको २८ वटा पोकामा गाँजा छोपिएको अवस्थामा फेला परेको थियो। इलाका प्रहरी कार्यालय अमलेखगञ्जका प्रमुख, प्रहरी वरिष्ठ नायब निरीक्षक धनप्रसाद श्रेष्ठको नेतृत्वमा खटिएको टोलीले उक्त बरामद गरेको हो।
यस घटनामा ट्रकका चालक मकवानपुरका रमेश रुम्बालाई नियन्त्रणमा लिइएको छ। प्रहरी प्रमुख वेदप्रकाश जोशीले बताए अनुसार, रुम्बामाथि थप अनुसन्धान जारी रहेको छ भने बरामद गाँजाको स्रोत र यसमा संलग्न अन्य व्यक्तिहरूको खोजी कार्य पनि भइरहेको छ।
प्रकाशित मिति: ६ आश्विन २०८२, सोमबार
प्रतिक्रिया