भ्रष्टचारीहरु लुटेको सम्पत्तिको बलमा चुनाव जितेर आउन सक्छन् : बाबुराम भट्टराई

काठमाडौं । नेसपा नयाँ शक्तिका नेता डा. बाबुराम भट्टराईले वर्तमान निर्वाचन प्रणालीमा देखिएको कमजोरी सुधार गरी प्रत्यक्ष निर्वाचित कार्यकारी राष्ट्रपतीय प्रणालीमा जानुपर्ने आवश्यकता औंल्याएका छन् । बिहीबार आयोजित पत्रकार सम्मेलनमा बोल्दै उनले जेनजीका प्रतिनिधिहरूसँग संवाद गर्दै यो परिवर्तनका लागि सरकारसँग औपचारिक वार्ता र लिखित सहमति गर्नुपर्ने सुझाव दिएका हुन् ।

उनले भने– ‘यो सरकार तपाईंहरूको पहलमा बनेको हो, त्यसैले वार्ता गरेर निर्वाचनअघि नै आवश्यक सुधारका काम सुरु गर्नुपर्छ । पहिलो चरणमा भने भ्रष्टाचारविरुद्ध छुट्टै आयोग गठन गर्नैपर्छ।’ भट्टराईका अनुसार अहिले घटनाको छानबिनका लागि आयोग बने पनि त्यो पर्याप्त नभई आंशिक मात्र भएको हो ।

भ्रष्टाचारलाई राजनीतिक अस्थिरताको मूल कारण ठहर गर्दै उनले थपे– ‘भ्रष्ट नेताहरूले लुटेर संकलन गरेका अर्बौं सम्पत्ति अझै लुकाइएका छन् । यही अवैध स्रोतको आधारमा उनीहरू चुनाव जित्ने गर्छन्, जसले गर्दा स्थिर सरकार बन्न सक्दैन।’

जेनजी आन्दोलनका क्रममा गरिएको संघर्ष, त्याग र बलिदानबाट हासिल भएको उपलब्धि जोगाउनुपर्नेमा पनि उनले जोड दिएका छन् ।

प्रकाशित मिति: ९ आश्विन २०८२, बिहिबार