काठमाडौं । नेकपा (एमाले)का अध्यक्ष केपी शर्मा ओलीले भदौ २३ र २४ गतेको आन्दोलनपछि मुलुकमा देखिएको वर्तमान अवस्था समाधानको दिशामा नबढेको बताएका छन्।
शनिबार भक्तपुरको गुण्डुमा आयोजित युवा संघ नेपालको कार्यक्रममा सम्बोधन गर्दै अध्यक्ष ओलीले अहिलेका गतिविधिहरू असंवैधानिक र अलोकतान्त्रिक बाटोतर्फ उन्मुख भएको बताएका हुन्।
‘अहिले जे भइरहेको छ, त्यो कुनै पनि अर्थमा समाधान होइन,’ ओलीले भने, ‘असंवैधानिक र अलोकतान्त्रिक बाटोले देशलाई समाधानतिर लैजान सक्दैन। केही मानिसले एक प्रतिशतभन्दा कम जनसंख्याको इच्छालाई ९९ प्रतिशत नेपालीमाथि लाद्ने प्रयास भइरहेको छ।’
अध्यक्ष ओलीले सबै राजनीतिक दल, नागरिक समाज, संघ–संस्था र विभिन्न शक्तिलाई संविधान र लोकतान्त्रिक प्रक्रियाबाटै निकास खोज्न आह्वान गरे।
‘राष्ट्रियता जोगाउन र राष्ट्रिय एकतालाई सुदृढ बनाउन अहिले सबै नेपाली एक ठाउँमा आउनुपर्छ,’ उनले भने, ‘हामीले शान्तिपूर्ण, सामाजिक सद्भावपूर्ण एकताबाटै देशको निकास निकाल्न सक्छौं। आउनुस्, छलफल गरौं, सहमति खोजौं र समाधान निकालौं।’
उनले राष्ट्रलाई सामान्य अवस्थातर्फ फर्काउने, शान्ति र सुव्यवस्था पुनःस्थापना गर्ने तथा विभाजनका खेलहरूको सामना गर्न सबैलाई सजग रहन आग्रह गरे।
‘विभिन्न शक्तिहरू नेपाललाई कहाँ पुर्याउन खोज्दैछन् भन्ने म स्पष्ट देखिरहेको छु,’ उनले भने, ‘नेपाली जनता सचेत र एकताबद्ध रहन जरुरी छ।’
प्रकाशित मिति: ११ आश्विन २०८२, शनिबार
प्रतिक्रिया