काठमाडौं । नेपालका छ महिला क्रिकेटरले मलेसियाको घरेलु टी–२० क्रिकेट प्रतियोगितामा खेल्ने भएका छन्।
मलेसियन क्रिकेट एसोसिएसनको आयोजनामा हुने ‘एमसिए वुमेन्स इन्टरस्टेट टी–२० च्याम्पियनसिप’ आगामी अक्टोबर १६ देखि २८ तारिखसम्म क्वालालम्पुरमा हुने भएको हो।
यस प्रतियोगितामा नेपाली खेलाडी दुई फरक राज्य टोलीबाट प्रतिनिधित्व गर्नेछन्। सिता राना मगर, कविता जोशी र राजमती ऐरी सेलाङगोर क्रिकेट एसोसिएसनबाट खेल्नेछन् भने रुबिना क्षेत्री, पूजा महतो र कविता कुँवर सारावाक क्रिकेट एसोसिएसनमा आबद्ध हुने भएका छन्।
हालै सम्पन्न नेपाल र मलेसियाबीचको पाँच खेलको टी–२० सिरिजमा नेपालले ३–२ ले विजयी भएको थियो। उक्त सिरिजपछि नेपाली टोली शुक्रबार स्वदेश फर्किएको हो। तर, घरेलु लिगमा आबद्ध रहेका यी छ खेलाडी भने मलेसियामै बसेका छन्।
यसअघि पनि नेपालका १४ महिला क्रिकेटरले मलेसियाको महिला फ्रेन्चाइज लिगमा सहभागिता जनाएका थिए। नयाँ प्रतियोगितामा उनीहरूको प्रदर्शनले नेपाली महिला क्रिकेटको अन्तर्राष्ट्रिय अनुभव थप समृद्ध बनाउने अपेक्षा गरिएको छ।
प्रकाशित मिति: २४ आश्विन २०८२, शुक्रबार
प्रतिक्रिया