काठमाडौं । राष्ट्रिय प्रजातन्त्र पार्टी (राप्रपा) का महामन्त्री डा. धवल शमशेर जबराले पार्टी अध्यक्ष राजेन्द्र लिङ्देनलाई मंसिर १८ गतेअघि नै महाधिवेशनको मिति तोक्न चेतावनी दिएका छन्। उनका अनुसार सो मितिसम्म वर्तमान कार्यसमितिको चार वर्षे कार्यकाल पूरा हुने भएकाले त्यसअघि महाधिवेशन घोषणा नभए समितिको वैधता समाप्त हुने छ।
आइतबार काठमाडौंमा आयोजित जबरा पक्षधर नेताहरूको भेलापछि सञ्चारकर्मीहरूसँग कुरा गर्दै उनले महाधिवेशनका लागि दबाब दिने उद्देश्यले भेला बोलाइएको बताए। भेलाले पार्टीभित्र देखिएका असन्तुष्टि समाधान गर्दै तीन प्रमुख निष्कर्ष निकालेको उनले जानकारी दिए— महाधिवेशन मिति छिट्टै तोक्ने, कारबाहीमा परेका नेताहरूको निलम्बन फुकुवा गर्ने, र पार्टीमा एकता पुनःस्थापित गर्ने।
महामन्त्री जबराले पार्टीको मूल एजेन्डा — संघीयता र गणतन्त्र खारेज गर्दै राजसंस्थासहितको हिन्दु राज्य पुनःस्थापना गर्ने अभियानलाई बलपूर्वक अघि बढाउनुपर्नेमा पनि जोड दिए।
उनले भने, ‘राप्रपा पहिचान र सिद्धान्तको पार्टी हो। त्यसलाई स्पष्ट दिशामा अघि बढाउन नेतृत्वले ढिलाइ गर्न मिल्दैन।’
गत माघ महिनादेखि केन्द्रीय समितिको बैठक नबसेको भन्दै जबरा समूहले बैठक तत्काल बोलाउन पनि माग गरेको छ। उनका अनुसार पार्टीभित्रको संस्थागत प्रक्रियालाई बलियो बनाउन अब अध्यक्षले निर्णायक कदम चाल्नैपर्ने समय आएको छ।
प्रकाशित मिति: २६ आश्विन २०८२, आइतबार
प्रतिक्रिया