काठमाडौं । इजरायलस्थित नेपाली राजदूत धनप्रसाद पण्डितले हमासको आक्रमणपछि अपहरणमा परेका नेपाली विद्यार्थी विपिन जोशी अब जीवित नरहेको जानकारी दिएका छन् ।
राजदूत पण्डितका अनुसार आइतबार साँझ (नेपाली समय अनुसार करिब साढे ७:३० बजे) इजरायली रक्षा बल (आईडीएफ)की एक महिला अधिकारीले फोनमार्फत् दूतावासलाई विपिन जोशी जीवित नरहेको औपचारिक जानकारी गराएकी थिइन् ।
उक्त सूचना प्राप्त भएपछि दूतावासले तुरुन्तै जोशी परिवारसँग सम्पर्क गरेको पण्डितले बताए । ‘हामीलाई फोन आएर भनियो कि विपिन अब जीवित छैनन्,’ उनले भने, ‘त्यसपछि अमेरिकामा रहेकी उनकी बहिनी पुष्पा जोशी र महेन्द्रनगरस्थित ठुलोबुबाका छोरा किशोर जोशीसँग भिडियो कन्फरेन्समार्फत् सम्पर्क गरी जानकारी गराइयो ।’
उनका अनुसार घटनाबारे थप विवरण इजरायली अधिकारीहरूसँग समन्वय गरेर लिइँदैछ । ‘हामी सबै पक्षसँग निरन्तर सम्पर्कमा छौँ र आधिकारिक पुष्टि तथा आवश्यक जानकारीका लागि प्रयासरत छौँ,’ राजदूत पण्डितले थपे ।
कञ्चनपुरका विपिन जोशी अध्ययनका सिलसिलामा विद्यार्थी भिसामा इजरायल पुगेका थिए । सन् २०२३ अक्टोबर ७ मा हमासले इजरायलको किबुत्ज अलुमिम क्षेत्रमा गरेको आक्रमणका क्रममा उनी सम्पर्कविहीन भएका थिए ।
राजदूत पण्डितका अनुसार विपिनको शवबारे कहिले र कसरी प्राप्त गर्न सकिने भन्ने विषयमा हालसम्म स्पष्टता आएको छैन । ‘शवको अवस्थाबारे पनि इजरायली पक्षसँग समन्वय भइरहेको छ,’ उनले भने ।
प्रकाशित मिति: २७ आश्विन २०८२, सोमबार
प्रतिक्रिया