रौतहट । रौतहटको गौर नगरपालिकामा बाढीको पानीमा डुबेर तीन बालिकाको मृत्यु भएको छ ।
गौर–१ स्थित सीमा नजिकको क्षेत्रमा घाँस काट्न गएका सात जनामध्ये राजदेवी नगरपालिका–८ की १३ वर्षीया आस्था कुमारी बैठा, १५ वर्षीया रागनी यादव र मौसमी बैठाको डुबेर ज्यान गएको हो ।
स्थानीयका अनुसार, ती सातै जना बालिका घाँस लिन गौरतर्फ जाँदै गर्दा आकस्मिक रूपमा बाढीको पानीमा परेका थिए । स्थानीयवासीले चार जनालाई जिवितै उद्धार गरेका थिए भने तीन जनाको शव पानीबाट निकालिएको प्रहरीले जनाएको छ ।
नेपाल प्रहरी र सशस्त्र प्रहरी बलको संयुक्त टोलीले खोजी तथा उद्धार कार्यपछि ती बालिकाहरूको शव फेला पारेको हो ।
तीनै जना मृतक बालिकाको शव पोस्टमार्टमका लागि प्रादेशिक अस्पताल गौरमा राखिएको प्रहरीले जानकारी दिएको छ ।
प्रकाशित मिति: २७ आश्विन २०८२, सोमबार
प्रतिक्रिया