काठमाडौं । सोमबार राति राजधानीको तीनकुनेमा भएको मोटरसाइकल दुर्घटनामा एक युवकको ज्यान गएको छ ।
काठमाडौं महानगरपालिका–३२ तीनकुनेस्थित सडक खण्डमा बा६८प ४१५३ नम्बरको मोटरसाइकल अनियन्त्रित भएर दुर्घटनाग्रस्त हुँदा चालक २१ वर्षीय समिर चौधरीको मृत्यु भएको हो । चौधरी कैलाली गोदावरी गाउँपालिका–८ का स्थायी बासिन्दा हुन् र हाल काठमाडौंको बानेश्वरमा बस्दै आएका थिए ।
दुर्घटनापछि गम्भीर घाइते भएका उनलाई तत्कालै उद्धार गरी सिनामंगलस्थित काठमाडौं मेडिकल कलेजमा उपचारका लागि लगिएको थियो । तर, उपचारको क्रममा उनको मृत्यु भएको काठमाडौं उपत्यका ट्राफिक प्रहरी कार्यालयका प्रवक्ता, प्रहरी उपरीक्षक नरेशराज सुवेदीले जानकारी दिए ।
प्रहरीका अनुसार दुर्घटनाको कारणबारे थप अनुसन्धान जारी छ ।
प्रकाशित मिति: २८ आश्विन २०८२, मंगलबार
प्रतिक्रिया