काठमाडौं । पूर्वसभामुख कृष्णबहादुर महराविरुद्ध दायर सुन तस्करीसम्बन्धी मुद्दामा काठमाडौं जिल्ला अदालतमा बयान प्रक्रिया सुरु भएको छ । न्यायाधीश हर्कबहादुर क्षेत्रीको इजलासमा मंगलबारदेखि उनको बयान लिइँदैछ ।
सोमबार मात्र सरकारी वकिलको कार्यालयले महराविरुद्धको अभियोगपत्र काठमाडौँ जिल्ला अदालतमा दर्ता गरेको थियो । उक्त अभियोगपत्रमा महरालाई ८ करोड ५५ लाख रुपैयाँ बिगो र तीन वर्षसम्मको कैद सजायको माग गरिएको छ ।
प्रहरीको केन्द्रीय अनुसन्धान ब्युरो (सीआईबी)ले आइतबार ललितपुरको खुमलटारबाट उनलाई पक्राउ गरेको थियो । सन् २०७९ पुस १० गते चिनियाँ नागरिक ली हासोङले इलेक्ट्रोनिक चुरोट ‘भेप’मा लुकाएर ल्याएको सुन तस्करी प्रकरणमा महरालाई पूरक अभियोगसहित एकल प्रतिवादीका रूपमा अदालतमा पेश गरिएको हो ।
उक्त प्रकरणको छानबिनका लागि गठन भएको सुन तस्करी नियन्त्रण जाँचबुझ आयोगले पनि महरालाई सुन तस्करीमा संलग्न ठहर गर्दै पुनः मुद्दा दायर गर्न सिफारिस गरेको थियो । हाल अदालतमा प्रारम्भिक बयानपछि थप सुनुवाइ प्रक्रिया अघि बढाइने तयारी गरिएको छ ।
प्रकाशित मिति: २८ आश्विन २०८२, मंगलबार
प्रतिक्रिया