काठमाडौं । निर्वाचन आयोगमा नयाँ राजनीतिक दल दर्ताका लागि हाल प्रवेश गर्नेको संख्या तीव्र रूपमा बढिरहेको छ। आइतबारमात्रै तीन वटा नयाँ दलले आयोगमा दर्ता निवेदन दिएका छन्।
आयोगका कानुन तथा राजनीतिक दल व्यवस्थापन महाशाखाका प्रमुख सहसचिव यज्ञप्रसाद भट्टराईका अनुसार राष्ट्रिय जेनजी पार्टी, नेपाल लिबरल पार्टी र राष्ट्रिय परिवर्तन पार्टीले नयाँ दलका रूपमा दर्ता गराउने प्रक्रिया अघि बढाएका हुन्।
राष्ट्रिय जेनजी पार्टीको अध्यक्षमा हिराप्रसाद सेती प्रस्ताव गरिएको छ। उक्त पार्टीले आफ्नो चुनाव चिन्हका लागि ‘क्रस खुकुरी’ माग गरेको आयोगले जनाएको छ।
त्यस्तै, गोपीलाल न्यौपानेको नेतृत्वमा नेपाल लिबरल पार्टी दर्ता निवेदन परेको छ। यस पार्टीले **‘सिक्का’**लाई चुनाव चिन्हका रूपमा प्रस्ताव गरेको छ।
उता, अजयकुमार राईको नेतृत्वमा गठन भएको राष्ट्रिय परिवर्तन पार्टीले पनि आयोगमा दर्ता निवेदन दियो। राई नेतृत्वको दलले **‘बाँसुरी’**लाई चुनाव चिन्हका रूपमा प्रस्ताव गरेको छ।
यसअघि असोज ९ गते अधिवक्ता सुरेन्द्र भण्डारीको नेतृत्वमा नेपाल नागरिक पार्टी दर्ता गर्न आवेदन परेको थियो। सो पार्टीले आफ्नो चिन्हका रूपमा ‘जेनजीको जुत्ता’ माग गरेको थियो।
यस्तै, दिनेश प्रसाईंको नेतृत्वमा गतिशील लोकतान्त्रिक पार्टीले पनि आयोगमा दर्ता प्रक्रिया अघि बढाएको छ।
यसअघि नै ज्ञानेन्द्रकुमार तामाङको नेतृत्वमा रहेको उज्यालो नेपाल पार्टीले ‘बलेको चिम’ चिन्ह माग्दै दर्ता निवेदन दिएको थियो।
हालसम्म आयोगमा नयाँ दल दर्ता गर्न आउनेको संख्या लगातार बढिरहेको र आगामी निर्वाचनलाई लक्षित गरेर नयाँ राजनीतिक समूहहरूको सक्रियता तीव्र बनेको आयोग स्रोतले जनाएको छ।
प्रकाशित मिति: ३ कार्तिक २०८२, सोमबार
प्रतिक्रिया