काठमाडौं । विवादास्पद व्यवसायी दुर्गा प्रसाईंलाई काठमाडौं उपत्यकाका सुरक्षा निकायका शीर्ष अधिकारीहरूले बोलाएर आइतबार विशेष छलफल गरेका छन् ।
काठमाडौं, ललितपुर र भक्तपुर — तीनै जिल्लाका प्रमुख जिल्ला अधिकारी (सीडीओ) र प्रहरी प्रमुखहरू सहभागी भएको बैठक काठमाडौं जिल्ला प्रशासन कार्यालयमा सम्पन्न भएको हो ।
काठमाडौंका सीडीओ ईश्वरराज पौडेलका अनुसार, प्रसाईंले छठ पर्वपछि आन्दोलन गर्ने घोषणा गरेको भन्दै प्रशासनले सुरक्षात्मक चासोका लागि उनलाई बोलाएर छलफल गरेको हो ।
‘प्रसाईंले सार्वजनिक रूपमा गरेका अभिव्यक्ति र सामाजिक सञ्जालमा प्रसारित गतिविधिबारे पनि छलफल भयो,’ सीडीओ पौडेलले बताए ।
उनका अनुसार प्रसाईंसँग आगामी दिनमा गर्ने भनिएको आन्दोलनबारे पनि सोधिएको थियो । जवाफमा प्रसाईंले अहिले तत्काल कुनै आन्दोलन कार्यक्रम तय नभएको बताएका छन् ।
बैठकमा ललितपुर र भक्तपुरका प्रमुख जिल्ला अधिकारीहरू तथा तीनै जिल्लाका प्रहरी प्रमुखहरू उपस्थित थिए । प्रशासनले प्रसाईंका पछिल्ला गतिविधि र सम्भावित सुरक्षा जोखिमका विषयमा समन्वयात्मक तयारी गर्न बैठक आयोजना गरेको बताइएको छ ।
प्रकाशित मिति: ९ कार्तिक २०८२, आइतबार
प्रतिक्रिया