काठमाडौं । राष्ट्रपति रामचन्द्र पौडेल सोमबार कतार भ्रमणका क्रममा दोहा पुगेका छन्, जहाँ कतारका लागि नेपाली राजदूत रमेशचन्द्र पौडेलले उनको स्वागत गरेका छन्। राजदूत पौडेल ती व्यक्ति हुन्, जसलाई सुशीला कार्की नेतृत्वको सरकारले हालै फिर्ता बोलाउने निर्णय गरेको थियो।
तर, आइतबारमात्रै सर्वोच्च अदालतले सरकारको उक्त निर्णय तत्काल कार्यान्वयन नगर्न अन्तरिम आदेश जारी गरेपछि उनी राजदूतको हैसियत कायम राख्न सफल भएका हुन्। अधिवक्ताहरू प्रतिभा उप्रेती र अनन्तराज लुईंटेलले दायर गरेको रिटमाथि न्यायाधीश शारंगा सुवेदी र श्रीकान्त पौडेलको संयुक्त इजलासले आदेश दिएको हो।
अदालतको आदेशकै कारण राजदूत पौडेलले राष्ट्रपति पौडेललाई दोहास्थित हमाद अन्तर्राष्ट्रिय विमानस्थलमा औपचारिक रूपमा स्वागत गर्ने अवसर पाएका हुन्। आदेश नआएको भए, उनले राजदूतको रूपमा त्यो भूमिका निर्वाह गर्न पाउने थिएनन्।
राष्ट्रपति पौडेल कात्तिक १८ देखि २० गतेसम्म कतारमा आयोजना हुने ‘सामाजिक विकासका लागि दोस्रो विश्व शिखर सम्मेलन’मा सहभागी हुन पुगेका हुन्। उनले उक्त सम्मेलनको मुख्य सत्रमा सम्बोधन गर्ने र सो अवसरमा कतारका अमिर शेख तमिम बिन हमद अल थानी तथा संयुक्त राष्ट्रसङ्घका महासचिव एन्टोनियो गुटेरेसलगायत उच्च dignitaryहरूसँग भेटवार्ता गर्ने कार्यक्रम रहेको छ।
कतारको औपचारिक भ्रमण सम्पन्न गरी राष्ट्रपति पौडेल कात्तिक २० गते स्वदेश फर्किने तय गरिएको छ।
प्रकाशित मिति: १७ कार्तिक २०८२, सोमबार
प्रतिक्रिया