काठमाडौं । नेकपा (माओवादी केन्द्र), नेकपा (एकीकृत समाजवादी) लगायत १० वटा कम्युनिष्ट दल/समूहबीच आज भृकुटीमण्डपमा ऐतिहासिक एकता घोषणा कार्यक्रम सुरु भएको छ।
कार्यक्रमको उद्घाटन सत्रमा माओवादी केन्द्रका नेता वर्षमान पुनले कार्यक्रममा सहभागी दलहरूमा माओवादी केन्द्र, एकीकृत समाजवादी, नेपाल (समाजवादी) पार्टी, जनसमाजवादी पार्टी नेपाल, नेकपा (समाजवादी), नेपाल समाजवादी पार्टी, नेपाल कम्युनिष्ट पार्टी, नेकपा (माओवादी समाजवादी), नेकपा (साम्यवादी) र देशभक्त समाजवादी मोर्चा रहेको जानकारी दिए। उनले सबै दलबीचको एकता घोषणालाई ऐतिहासिक र जनतामुखी कदमको रूपमा वर्णन गरे।
पुनका अनुसार, ‘जेन–जी आन्दोलन’पछि नेपाल राजनीतिक, आर्थिक र सामाजिक रूपमा नयाँ मोडमा उभिएको छ। उनले राष्ट्रिय स्वाधिनता चुनौतीपूर्ण बन्नु र भू–राजनीतिक टकरावहरू देखिनु यस नयाँ मोडका मुख्य पक्ष भएको बताए। साथै, पछिल्लो पुस्ताले स्मार्ट र नवीन समाधान खोजेकोले नयाँ राजनीतिक दलहरूका काँधमा चुनौती थपिएको उनले बताए।
यसअघि विभिन्न आठ दलले कात्तिक १६ गते सहमतिपत्रमा हस्ताक्षर गर्दै एकताका लागि औपचारिक सहमति जनाइसकेका थिए। सोही सहमतिअनुसार आज बुधबार ऐक्यबद्धता सार्वजनिक गर्दै सबै दलबीचको एकता औपचारिक रूपमा घोषणा गरिएको हो।
प्रकाशित मिति: १९ कार्तिक २०८२, बुधबार
प्रतिक्रिया