काठमाडौं । नेपाली कांग्रेसका वरिष्ठ नेता प्रकाशमान सिंहले पार्टी आगामी निर्वाचनमा सहभागी हुने र अहिलेसम्म उठेको विशेष महाधिवेशनको माग अहिलेसम्मको राजनीतिक परिस्थितिमा आवश्यक नभएको बताएका छन्।
आज शोभा भगवतीमा आयोजित कार्यक्रममा, जसको अवसरमा नेपाली कांग्रेसका नेता स्व. गणेशमान सिंहको १११ औं जन्मजयन्ती मनाइएको थियो, सिंहले कांग्रेस लोकतान्त्रिक मूल्य र प्रणालीमा विश्वास गर्ने पार्टी भएको भन्दै निर्वाचनमार्फतै जनतासामु जानुपर्नेमा जोड दिएका हुन्।
उनले भने, ‘नेपाली कांग्रेस लोकतान्त्रिक पार्टी हो। हामी चुनावमा सहभागी हुनेछौं र देशको यस संकटलाई पार लगाउने जिम्मेवारी पार्टीले पूरा गर्नेछ।’
सिंहले पछिल्ला दिनमा उठेका विशेष महाधिवेशनको मागप्रति टिप्पणी गर्दै भने, ‘नियमित महाधिवेशन नजिकै आइरहेको अवस्थामा विशेष महाधिवेशनको कुनै औचित्य छैन। अहिलेको प्राथमिकता भनेको देशलाई संकटबाट निकाल्ने र जनताको विश्वास जित्ने हो।’
उनले जेन-जीका माग र अपेक्षालाई सम्बोधन गर्न पार्टीले आन्तरिक गृहकार्य गरिरहेको र नयाँ पुस्ताको विचार, ऊर्जा र आकांक्षालाई पार्टी संरचनामा समावेश गर्नुपर्ने आवश्यकता रहेको पनि औंल्याए।
कार्यक्रममा नेपाली कांग्रेसका नेताहरू, कार्यकर्ता र स्थानीयबासीहरूले स्व. गणेशमान सिंहको लोकतान्त्रिक योगदानको स्मरण गर्दै उनको सालिकमा माल्यार्पण गरेका थिए।
प्रकाशित मिति: २४ कार्तिक २०८२, सोमबार
प्रतिक्रिया