विराटनगर । मोरङको लेटाङ–२, फडानीकी १३ वर्षीय अंशु गौतमको हत्या प्रकरणमा प्रहरीले उनका छिमेकीलाई पक्राउ गरेको छ। करिब दुई महिनादेखि जारी अनुसन्धानपछि ५९ वर्षीय एक पुरुषलाई नियन्त्रणमा लिएर अनुसन्धान अगाडि बढाइएको भए पनि प्रहरीले औपचारिक रूपमा पक्राउबारे कुनै जानकारी सार्वजनिक गरेको छैन।
अंशु गत असोज २१ गते दिउँसो घरबाट निस्केकी थिइन् र कात्तिक ७ गते बेलबारी–चिसाङ साझेदारी वनमा मृत अवस्थामा फेला परेकी हुन्। उनको शव अत्यन्तै क्षतविक्षत अवस्थामा भेटिएको थियो।
मोरङ प्रहरी प्रमुख कविता कटुवालका अनुसार प्रकरणको अनुसन्धान अन्तिम चरणमा पुगेको छ। उनले बताएअनुसार, पक्राउ परेका व्यक्तिले अंशुको हत्या गरेको स्वीकार गरेको भए पनि हत्याको कारण अहिलेसम्म सार्वजनिक गरिएको छैन। प्रारम्भिक अनुमानअनुसार पारिवारिक रिस–राग मुख्य कारण हुन सक्ने प्रहरीको बुझाइ छ।
प्रकाशित मिति: २१ मंसिर २०८२, आइतबार
प्रतिक्रिया