काठमाडौं । पाकिस्तान सुपर लिग (पिएसएल) र इन्डियन प्रिमियर लिग (आईपीएल) को सन् २०२६ को सिजन एकै दिन अर्थात् मार्च २६, २०२६ बाट सुरु हुने भएका छन् । यससँगै विश्वका दुई ठूला टी–२० लिगबीच प्रत्यक्ष प्रतिस्पर्धा हुने निश्चित भएको छ ।
पाकिस्तान क्रिकेट बोर्ड (पिसिबी) का अध्यक्ष मोहसिन नक्वीका अनुसार पिएसएलको ११औँ संस्करण मार्च २६ देखि मे ३, २०२६ सम्म सञ्चालन हुनेछ । यो सिजन पिएसएलको इतिहासकै सबैभन्दा लामो हुने बताइएको छ । यसपटक टोली संख्या ६ बाट बढाएर ८ पुर्याइने भएकाले खेल संख्या पनि बढ्नेछ र लिग ३९ दिनसम्म चल्नेछ ।
उता भारतीय क्रिकेट कन्ट्रोल बोर्ड (बिसिसिआई) ले आईपीएल २०२६ को मिति मार्च २६ देखि मे ३१, २०२६ सम्म तय गरेको छ । यसरी लगातार दोस्रो वर्ष दुई लिगको समय जुधेको हो । सन् २०२५ मा पनि पिएसएल र आईपीएल एकै समयमा आयोजना भएका थिए ।
अन्तर्राष्ट्रिय क्रिकेट क्यालेन्डर अत्यन्तै व्यस्त भएकाले पिसिबीले पिएसएललाई परम्परागत फेब्रुअरी–मार्चबाट सारेर अप्रिल–मे तर्फ लैजाने रणनीति अपनाएको देखिन्छ । सन् २०२६ मा फेब्रुअरी–मार्च महिनामा भारत र श्रीलंकामा टी–२० विश्वकप आयोजना हुने भएकाले त्यसपछि आईपीएल र पिएसएल सञ्चालन हुनेछन् ।
एकै समयमा दुवै लिग हुँदा विदेशी खेलाडीहरूको उपलब्धता, प्रसारण अधिकार तथा विश्वव्यापी दर्शक संख्यामा ठूलो प्रभाव पर्न सक्ने देखिन्छ । आर्थिक रूपमा बलियो आईपीएललाई धेरैजसो शीर्ष विदेशी खेलाडीहरूले प्राथमिकता दिने सम्भावना रहेकाले पिएसएललाई खेलाडी भित्र्याउन चुनौती सामना गर्नुपर्ने अनुमान गरिएको छ ।
प्रकाशित मिति: २ पुस २०८२, बुधबार
प्रतिक्रिया