काठमाडौं । नेकपा एमालेको अध्यक्ष पदमा भारी मतान्तरले विजयी भएका केपी शर्मा ओली केन्द्रीय सदस्यमा भने पराजित भएका छन्। एमालेको विधानअनुसार पदाधिकारी पदमा उम्मेदवारी दिनेले केन्द्रीय सदस्यमा पनि उम्मेदवारी दिन पाउने व्यवस्था छ।
अध्यक्ष पदमा १ हजार ६ सय ६३ मत प्राप्त गरी विजयी भएका ओलीले केन्द्रीय सदस्यतर्फ भने ९ सय ७९ मत मात्र पाउँदै पराजय बेहोरेका छन्। एमाले केन्द्रीय निर्वाचन आयोगले सार्वजनिक गरेको अन्तिम मतपरिणामअनुसार खुला केन्द्रीय सदस्यतर्फ २८औँ स्थानमा रहेका ओली पराजित भएका हुन्।
यस्तै, अध्यक्ष पदमा ५ सय ६४ मत ल्याएर पराजित भएका ईश्वर पोखरेल भने केन्द्रीय सदस्यमा विजयी भएका छन्। एमाले निर्वाचन आयोगका अनुसार पोखरेल खुला केन्द्रीय सदस्यतर्फ ९औँ स्थानमा रहँदै १ हजार ८८ मतसहित निर्वाचित भएका छन्।
प्रकाशित मिति: ४ पुस २०८२, शुक्रबार
प्रतिक्रिया