ललितपुरमा भारतीय इन्जिनियरको बीभत्स हत्या

काठमाडौं । ललितपुर महानगरपालिका–२४ धापाखेलमा डेढ महिनाअघि मृत फेला परेका भारतीय इन्जिनियरको हत्या भएको पुष्टि भएको छ । कात्तिक १९ गते ४६ वर्षीय देवकुमार निर्माणाधीन कोलोनीको प्यासेज क्षेत्रमा गाडिएको अवस्थामा मृत भेटिएका थिए ।

प्रहरी अनुसन्धान अनुसार भवनको डिजाइन कार्यका लागि नेपाल आएका देवकुमारको हातखुट्टा बाँधेर हत्या गरिएको देखिएको छ । शव उत्खननका क्रममा मुखमा टेप लगाइएको र हातखुट्टा बाँधिएको अवस्था फेला परेको ललितपुरका वरिष्ठ प्रहरी उपरीक्षक (एसएसपी) होविन्द्र बोगटीले जानकारी दिए । उनले घटनाबारे गम्भीरतापूर्वक अनुसन्धान भइरहेको बताए ।

प्रारम्भिक अनुसन्धानमा मृतकको टाउकोमा चोट देखिएको छ । प्रहरीले निर्माणाधीन घरमा काम गर्ने मजदुरको संलग्नता हुनसक्ने आशंका गरेको छ । अनुसन्धानमा संलग्न एक अधिकारीका अनुसार घटनामा कम्तीमा दुई जना व्यक्तिको संलग्नता हुनसक्ने प्रारम्भिक निष्कर्ष निकालिएको छ ।

हत्यामा संलग्न आशंकित व्यक्ति घटना भएदेखि हालसम्म फरार छन् । घटनास्थल प्रहरी वृत्त सातदोबाटोको कार्यक्षेत्रभित्र पर्छ । यस प्रकरणको अनुसन्धान उपत्यका अपराध अनुसन्धान कार्यालय तथा जिल्ला प्रहरी परिसर ललितपुरका टोलीले संयुक्त रूपमा अघि बढाइरहेका छन् ।

प्रकाशित मिति: ४ पुस २०८२, शुक्रबार