आज पशुपतिनाथको उपवास ! गरिएन नित्यपूजा, साँझ आरती मात्रै

काठमाडौँ । सनातनीका आराध्यदेव भगवान् पशुपतिनाथको नित्यपूजा शुक्रबार नहुने भएको छ। अघिल्लो दिन राति धनुर्मास पूजा गरेपछि भोलिपल्ट उपवास राख्ने  परम्पराअनुसार शुक्रबार पशुपतिनाथको नित्यपूजा नभएको हो।

शुक्रबार बिहान र दिउँसोका पूजा नभए पनि साँझ आरती हुने पशुपति क्षेत्र विकास कोषका कार्यकारी निर्देशक सुभाषचन्द्र जोशीले जानकारी दिए।

उपवासका दिन बिहानै महादेव शिवपुरी डाँडामा गएर तोरीको तेल लगाएर घाममा शयन गर्ने धार्मिक विश्वास छ। बिहानै पशुपतिनाथलाई तोरीको तेल लगाइन्छ। शिवपुरी डाँडामा दिनभर घाम तापेर फर्किने  विश्वासमा साँझ भने आरती गर्ने परम्परा रहेको जोशीले बताए।

जाडोयाममा विशेषगरी पुस महिनामै पशुपतिनाथको धनुर्मास पूजा गर्ने परम्परा छ। पुसलाई ज्योतिषीय भाषामा धनु मास भनिन्छ। सौर र चान्द्र दुवै पुस रहेको महिनामा पशुपतिनाथलाई धनुर्मास पूजा गर्ने परम्परा छ।

पशुपतिनाथलाई चिसोबाट बचाउन यो पूजा गरिएको बताइन्छ। धनुर्मास पूजामा पशुपतिनाथलाई तातोपानीले स्नान गराइन्छ। खिचडीको भोग लगाइन्छ। घ्यू र चाकुजस्ता पदार्थ पनि चढाइन्छ।

दिनभर बन्द रहने पशुपतिनाथको मन्दिर साँझदेखि श्रद्धालुका लागि खुला हुने कोषले जनाएको छ।