पोखरा । राष्ट्रिय स्वतन्त्र पार्टी (रास्वपा) सभापति रवि लामिछानेले आफ्नो पार्टी कुनै पनि हालतमा विधानभन्दा बाहिर नजाने दाबी गरेका छन्। बुधबार पोखरामा सञ्चारकर्मीहरूसँगको अन्तरक्रियामा उनले यस्तो स्पष्ट पारेका हुन्।
लामिछानेले रास्वपा परिवारवादमा स्पष्ट रहेको पनि औँल्याए। उनका अनुसार, ‘रास्वपाको विधानं छ, विधानभन्दा बाहिर हामी कुनै हालतमा जाँदैनौं। परिवारवादमा रास्वपा पूर्ण रूपमा स्पष्ट छ। यदि विधानले अनुमति दिँदैन भने कतै पनि अनधिकृत रूपमा अघि बढिँदैन। विधानमा नै ‘राइट टु रिभ्यू’ को व्यवस्था छ, त्यसैले आवश्यकता परेमा त्यसलाई प्रयोग गरिन्छ।’
समानुपातिक बन्दसूचीमा समावेश केही व्यक्तिहरूको विषयमा उठेका आलोचनाको जवाफ दिँदै उनले भने, ‘पछिल्लो राजनीतिक घटनाक्रमका कारण हामीलाई छिटो निर्णय गर्नु परेको थियो। नयाँ तरिकाले एक ठाउँमा उभिएर अघि बढ्नको लागि तयारी समय पर्याप्त थिएन। कुलमानजीसँग अन्तिम समयमा सहमति गर्दै सूची बुझाउने प्रक्रिया थियो, त्यसैले केही असुविधा वा समस्या देखिन सक्ने अवस्था आएको हो। यदि कुनै गुनासो भएमा समीक्षा गरिनेछ।’
लामिछानेले थपे, ‘हामी सचेत छौं। समय सानो भएकाले केही विवादहरू उत्पन्न भएका हुन सक्छन्। तर दुई दिनभित्र सबै जायज गुनासोको समाधान गरिनेछ। पार्टीमा कुनै अनावश्यक व्यक्ति राखिने छैन।’
अनलाइनखबरको प्रश्नमा कि समानुपातिक सूचीमा धनी वा चर्चित व्यक्तिहरू समावेश गरिएको देखियो, त्यसमा उनले जवाफ दिएका छन्, ‘नेपालको राजनीतिक अवस्था यस्तो छ कि विभिन्न तह, पेशा र वर्गका मानिसहरूले राजनीतिमा चासो बढाएका छन्। देशमा राजनीतिमा विश्वास गुम्दा धेरै सचेत नागरिकहरू पनि सक्रिय भएका छन्। यसैले सूचीमा विविध तहका प्रतिनिधि समावेश हुनु स्वाभाविक हो।’
प्रकाशित मिति: १६ पुस २०८२, बुधबार
प्रतिक्रिया