काठमाडौं । नेपाली कांग्रेसभित्र विशेष महाधिवेशनको माग गर्ने पक्षधरले पुस २७ र २८ गते भृकुटीमण्डप हल बुक गरेका छन्।
गत असोज २९ गते विशेष महाधिवेशनको माग गर्दै कार्यवाहक सभापति पूर्णबहादुर खड्कालाई २ हजार ४८८ महाधिवेशन प्रतिनिधिको हस्ताक्षर बुझाइएको थियो। कांग्रेस विधानअनुसार ४० प्रतिशत महाधिवेशन प्रतिनिधिले हस्ताक्षर बुझाएपछि पार्टीले विशेष कारण खोली ३ महिनाभित्र महाधिवेशन गर्नु अनिवार्य छ।
तर, ५० प्रतिशतभन्दा बढी प्रतिनिधिले हस्ताक्षर बुझाएको तीन महिनासम्म पनि पार्टीले विशेष महाधिवेशन नगरेको भन्दै पक्षधरले अब स्वयं हल बुक गरेको बताएका छन्।
विशेष महाधिवेशनका लागि हस्ताक्षर सङ्कलनको नेतृत्वकर्ता मनोजमणि आचार्यले भृकुटीमण्डप हल पुस २७ र २८ गतेका लागि बुक गरिएको जानकारी दिएका छन्। उनले भने, ‘हामीले पुस २७ र २८ गतेका लागि भृकुटीमण्डप बुक गरेका छौँ। पार्टीले नियमित महाधिवेशन नगरेकोले दुई दिनको विशेष महाधिवेशन आयोजना हुनेछ।’
हल बुक गर्नका लागि लेखनाथ पोखरेल जानु भएको थियो र हल बुक भएपछि पार्टीलाई जानकारी गराइने पनि आचार्यले बताए।
प्रकाशित मिति: १७ पुस २०८२, बिहिबार
प्रतिक्रिया