काठमाडौं । नेकपा एमालेले अमेरिकाले भेनेजुएलाका राष्ट्रपति निकोलस मादुरोलाई नियन्त्रणमा लिएको घटनाप्रति कडा आपत्ति जनाएको छ ।
पार्टीका महासचिव शङ्कर पोखरेलले शुक्रबार सामाजिक सञ्जाल फेसबुकमार्फत प्रतिक्रिया जनाउँदै कुनै एक देशका जननिर्वाचित राष्ट्र प्रमुखलाई अर्को देशको राष्ट्र प्रमुखको आदेशमा सैन्य हस्तक्षेपमार्फत नियन्त्रणमा लिने र अभियोग लगाउने कार्य संयुक्त राष्ट्रसङ्घको वडापत्रको स्पष्ट उल्लङ्घन भएको बताएका छन् । यस्तो कदमले संयुक्त राष्ट्रसङ्घसहित अन्तर्राष्ट्रिय संस्थाहरूको औचित्यमाथि नै प्रश्न उठाउने पोखरेलको भनाइ छ ।
उनले अमेरिकाको यो कदम आधुनिक विश्व व्यवस्था र सभ्य समाजका लागि कदापि स्वीकार्य नहुने उल्लेख गर्दै भेनेजुएलामा भएको अमेरिकी हस्तक्षेपले अन्तर्राष्ट्रिय कानुन, राष्ट्रिय सार्वभौमिकता र लोकतान्त्रिक मूल्यहरूलाई गम्भीर रूपमा कमजोर बनाएको टिप्पणी गरेका छन् ।
महासचिव पोखरेलले यस्ता विषयमा स्वयं अमेरिकी समाजभित्रै गम्भीर, जिम्मेवार र व्यापक बहस आवश्यक रहेको पनि बताएका छन् ।
प्रकाशित मिति: २० पुस २०८२, आइतबार
प्रतिक्रिया