बुटवल । कपिलवस्तुमा विद्यार्थी बोकेको स्कुल बस पल्टिँदा सात जना विद्यार्थी घाइते भएका छन्। सोमबार जिल्लाको मायादेवी गाउँपालिका–३ बर्सौलीमा भएको घटनामा घाइते विद्यार्थीहरूको अवस्था स्थिर रहेको प्रहरीले जनाएको छ।
शुद्धोदन गाउँपालिका–१ स्थित सनलाइट इङ्लिस बोर्डिङको लु १ क ५७२२ नम्बरको बस फुलीका बाटो हुँदै बगदीतर्फ आउँदै गर्दा दुर्घटनामा परेको जिल्ला प्रहरी कार्यालय कपिलवस्तुले जनाएको छ।
घाइते हुनेमा मायादेवी गाउँपालिका–३ खैरेटीका १२ वर्षीय प्रान्सु पाल, १४ वर्षकी अनिता बराई, ११ वर्षीय विशेष थारु, ८ वर्षीय अमन यादव, ८ वर्षीय सुदिप यादव, टिकौलीका १० वर्षीय आईसा भट्टराई र १४ वर्षीय गुन्जा कहार रहेका छन्।
घाइते विद्यार्थीहरूलाई तत्काल युनिभर्सल मेडिकल कलेज, भैरहवामा उपचारका लागि पठाइएको छ। प्रहरीले बस चालकसँग थप विवरण संकलन गर्दै दुर्घटनाको कारण पत्ता लगाउने प्रयास गरिरहेको छ।
प्रकाशित मिति: २१ पुस २०८२, सोमबार
प्रतिक्रिया