काठमाडौं । ऊर्जा, भौतिक पूर्वाधार तथा सहरी विकासमन्त्री कुलमान घिसिङले पदबाट राजीनामा दिने तयारी गरेका छन्। प्रधानमन्त्री सुशीला कार्की नेतृत्वको सरकारमा तीनवटै मन्त्रालयको जिम्मेवारी सम्हालिरहेका घिसिङले मन्त्री पदमा रहँदै दलीय गतिविधि र निर्वाचनको तयारी थालेको भन्दै आलोचना बढेपछि राजीनामा दिने निर्णयतर्फ अग्रसर भएका हुन्।
कुलमान निकट एक नेताका अनुसार राजीनामाबारे आन्तरिक छलफल भइरहेको छ र सम्भवतः छिट्टै उनले मन्त्री पद त्याग्नेछन्। सरकारमा सहभागी रहँदै राजनीतिक दलको तर्फबाट चुनावी गतिविधिमा सक्रिय भएको आरोप लागेपछि नैतिकताका आधारमा राजीनामा दिन लागिएको बताइएको छ।
घिसिङ भदौ ३० गते ऊर्जा, भौतिक पूर्वाधार तथा सहरी विकास मन्त्रालयको जिम्मेवारीसहित मन्त्री नियुक्त भएका थिए। तर मन्त्री बनेपछि नै उनी निर्वाचन केन्द्रित गतिविधिमा लागेको भन्दै सत्ता पक्ष र विपक्षी दुवैबाट आलोचना हुँदै आएको थियो।
यसअघि प्रधानमन्त्री सुशीला कार्कीले मन्त्रिपरिषद् बैठकमै राजनीति वा निर्वाचनमा सक्रिय हुने मन्त्रीहरूले पदमा बसिरहन नहुने स्पष्ट निर्देशन दिएकी थिइन्। कुलमानले आगामी निर्वाचन लड्ने निश्चित भइसकेकाले सोही निर्देशनअनुसार राजीनामा दिएर चुनावी तयारीमा लाग्ने तयारी गरेको उनको निकट स्रोतले जनाएको छ।
राजीनामाको औपचारिक घोषणा भने हुन बाँकी रहेको छ।
प्रकाशित मिति: २३ पुस २०८२, बुधबार
प्रतिक्रिया