एजेन्सी । अमेरिकी राष्ट्रपति डोनाल्ड ट्रम्पले विरोध प्रदर्शनको नाममा सैन्य हस्तक्षेपको सङ्केत गरेपछि इरानले कडा चेतावनी जारी गरेको छ।
इरानी संसद्का सभामुख मोहम्मद बाघेर कालिबाफले आइतबार संसद् सभामा सम्बोधन गर्दै भने, ‘यदि अमेरिकाले इस्लामिक गणतन्त्रविरुद्ध आक्रमण गर्यो भने अमेरिकी सेना र इजरायल दुवै ‘वैध लक्ष्य’ बन्नेछन्।’ यससँगै पहिलो पटक इरानले सम्भावित जवाफी कारबाहीको सूचीमा खुल्लमखुल्ला इजरायललाई पनि समेटेको छ।
संसद् बैठकका क्रममा केही सांसदहरूले मञ्चतर्फ उक्लिँदै ‘अमेरिका मूर्दावाद!’ भन्ने नारा लगाएका थिए, जुन कालिबाफले समर्थनका साथ चेतावनीको रूपमा प्रस्तुत गरे।
कालिबाफको यो अभिव्यक्ति अमेरिकी राष्ट्रपति ट्रम्पले शान्तिपूर्ण प्रदर्शनकारीमाथि दमन भए तत्काल हस्तक्षेप गर्न सक्ने चेतावनी दिएका केही समयपछि आएको हो। अमेरिकी सञ्चार माध्यमका अनुसार ट्रम्पलाई इरानमाथि सम्भावित सैन्य विकल्पका बारेमा जानकारी गराइए पनि अन्तिम निर्णय अहिलेसम्म नभएको बताइएको छ।
यसैबीच, इरानको नेतृत्वले देशभित्रको अशान्ति बाह्य शक्तिद्वारा उक्साइएको दाबी गर्दै सुरक्षा निकायलाई कडा कदम चाल्न सतर्क रहन निर्देशन दिएको छ।
इरान र अमेरिकाबीच बढ्दो तनावले मध्यपूर्व क्षेत्रमा थप अस्थिरता निम्त्याउने चिन्ता अन्तर्राष्ट्रिय समुदायमा पनि बढ्दो रूपमा व्यक्त हुँदैछ।
प्रकाशित मिति: २७ पुस २०८२, आइतबार
प्रतिक्रिया