तनहुँ । तनहुँ जिल्लाको आबुखैरेनी गाउँपालिका–५ द्धोन्द्राङबेसी नजिक त्रिशूली नदीको किनारमा बालुवाले पुरिएको अवस्थामा भेटिएको गाडीको उत्खनन कार्य आज पनि जारी रहेको छ।
आइतबार बिहान सिमलतालभन्दा केही तल त्रिशूली नदीको किनारमा गाडीका पार्टपुर्जा देखिएको सूचना प्राप्त भएपछि खोज तथा उत्खननका लागि सशस्त्र प्रहरी बल नेपाल नं. १७ गण चितवन र नं. २३ मनकामना गण भानुबाट संयुक्त टोली खटिएको थियो।
नदी किनारमा फेला परेका ती पार्टपुर्जा २०८१ असार २८ गते बिहान चितवनको भरतपुर महानगरपालिका–२९ सिमलतालमा पहिरोले पुरिएर त्रिशूली नदीमा बेपत्ता भएको गाडी हुन सक्ने आशंका गरिएको छ।
उक्त दिन वीरगञ्जबाट काठमाडौँतर्फ आउँदै गरेको बागमती प्रदेश ०३–००६ ख १५१६ नम्बरको डिलक्स बस र काठमाडौँबाट गौरतर्फ जाँदै गरेको बागमती प्रदेश ०३–०११ ख २५९५ नम्बरको बस पहिरोमा परेर नदीमा बेपत्ता भएका थिए।
उत्खनन तथा थप पहिचानको काम जारी रहेको सशस्त्र प्रहरी बल नेपालका सहप्रवक्ता डीएसपी शैलेन्द्र थापाले जानकारी दिएका छन्।
प्रकाशित मिति: २९ पुस २०८२, मंगलबार
प्रतिक्रिया