भक्तपुर । मध्यपुरथिमि–२ सानोथिमिस्थित बाल सुधारगृहमा बिहीबार राति दुई समूहबीच भएको झडप आगजनी र तोडफोडमा परिणत भएको छ।
झडप बढेपछि थिमि प्रहरी वृत्तका प्रमुख नवराज ढुङ्गानाको नेतृत्वमा प्रहरी टोली घटनास्थल पुगेको थियो। तर झडपमा संलग्न दुवै समूहले प्रहरीमाथि ढुंगामुढा गरेपछि स्थिति नियन्त्रण बाहिर गएको थियो। त्यसपछि सशस्त्र प्रहरी बलबाट ५० जना परिचालन गरिएको प्रहरीले जनाएको छ।
मध्यरातमा भक्तपुर र काठमाडौँबाट पुगेका वारुणयन्त्रले आगो नियन्त्रणमा लिएका थिए। सुधारगृहमा भएको क्षतिको विस्तृत विवरण आउन बाँकी रहेको थिमि प्रहरी वृत्तले जनाएको छ।
उक्त बाल सुधारगृहमा हाल १४५ पुरुष र २४ महिला गरी १६९ जना रहेका छन्। अहिले स्थिति नियन्त्रणमा आइसकेको भए पनि सम्भावित जोखिमलाई ध्यानमा राख्दै सुरक्षाकर्मीहरू बाक्लो संख्यामा तैनाथ गरी निगरानी बढाइएको छ।
प्रकाशित मिति: ९ माघ २०८२, शुक्रबार
प्रतिक्रिया