काठमाडौं । नेपाली कम्युनिस्ट पार्टीका संयोजक पुष्पकमल दाहाल प्रचण्डले आफू तेस्रो पटक प्रधानमन्त्री हुँदा थालेको भ्रष्टाचार विरोधी अभियान अधुरै रहेको बताएका छन्।
रुकुम पूर्व–काठमाडौं सम्पर्कको कार्यक्रममा बोल्दै सामाजिक विभेदका विरुद्ध सामाजिक न्यायका निम्ति सुरु गरेको अभियान पनि अधुरै रहेको बताए।
उनले भने, ‘हामीले विकासको एउटा नयाँ मोडेल दिन सकिएन भने हाम्रो यात्रा, सहिदहरूका सपना, क्रान्तिकारीहरूका सपना अधुरै हुने खतरा छ। त्यसकारण हामी समुदायमा आधारित समाजवादको मोडेल खडा गर्नु छ।’
विभिन्न जिल्ला र क्षेत्रबाट उम्मेदवार सिफारिस भए पनि देशको राजनीतिक परिस्थिति, पार्टी र आन्दोलनको आवश्यकताको आधारमा आफूले पूर्वी रुकुम रोजेको बताए।
उनले थपे, ‘पूर्वी रुकुमका हाम्रा सबै नेता कार्यकर्ता कमरेडहरूको पनि भावना र चाहना मैले नजिकबाट हेरेको थिएँ। त्यहाँका जनताको चाहनालाई पनि मैले आत्मसात् गरेर नै पूर्वी रुकुम नै जाने निर्णय गरेँ। मैले सुरुमा भनेँ पूर्वी रुकुम जानु भनेको अन्यत्र गएजस्तो मात्रै होइन भन्ने मेरो बुझाइ छ। पूर्वी रुकुम नेपाली क्रान्तिको, जनयुद्धकालको एउटा केन्द्रीय आधार इलाका हो।’
उनले स्वच्छ, निष्पक्ष र धाँधलीरहित रूपमा चुनाव भए नेकपा पहिलो पार्टी बन्नसक्ने बताए।
उनले भने, ‘देशमा निर्वाचनको माहोलमा बन्दै गइरहेको छ। एकसरी मानिस अनेक बहानामा निर्वाचन हुँदैन भन्ने गरेको थिए। नेपाली कम्युनिस्ट पार्टी समानुपातिकमा त म भन्न सक्दिनँ नयाँ भन्नेको हावा चलेकै छ। तर प्रत्यक्षमा हामी अगाडी हुन्छौँ। प्रत्यक्ष र समानुपातिक जोड्दा हामी एक नम्बर पार्टी बन्ने सम्भावना छ।’
प्रकाशित मिति: १६ माघ २०८२, शुक्रबार
प्रतिक्रिया